Autor: blog@oberland-gschichtn.de

Mia war’n etz erst im Rom.
Mei liaba do moanst glei direkt du lebst 2000 Johr davor. Dreckata ois wia heit war’s wahrscheinle domois á net aber de oidn Bauwerke san scho beeindrucknd.

Des Kolosseum aloa is’ scho da’wert dass ma hi’fliagt.

Mia hom uns des Weda zwar net ausg’suacht aber dafia war de Schlanga hächstns 3 Stund lang.
Ja, i hät me á net so lang hig’steit – aba i hob ja vorher im Internet an ROMA-PASS kafft und do soitat ma eingle net lang o’steh miassn.
I bin voraus und hob mein Roma-Pass herzoagt und wia auf Kommando sans um mi rum, hom me neig’fiat – an da Schlanga vabei und da Georg hinta mia noché,
dann no hi zur Sicherheitsschleuse und scho war i drin.
Ja und dann här i hinta mir bloss no ois piepn und Olle umanandawichtln.
Da Sicherheitsmensch is zum Georg hi, hotn bäs g’schaugt und g’sogt “Sie haben ein Messer”.
I schaug’n ó und sog “so a Schmarrn” und da Georg “des konn scho sei” häh, wia etz??
Do san mia Ruck Zuck drin und etz sowos, beinah hätts me glei z’rissn – er hot im Rucksock a kloans Messer mit Lampn, Schraumziaga und Dosnöffner drin g’habt und des hot er gar net ei’gseng dass er des hergem soit – wo kemm ma denn do hi… Er hot dann dem Beamtn ois vorg’fiat (hinter uns warns scho leicht zwieda) und siehe da, der Mo hot des vastandn dass ma sowos unbedingt braucht – und endlich war ma wirklich drin.
Na ja so g’seng hot friera a jed’s Mannsbuid an Hirschfänger dabei g’habt und koana hot se aufg’regt.

Ja und ab jetzt hom ma bloss no g’staunt

des war’n de unterirdischen Gänge wo de Viecher und de Gladiatoren vorbereit’ worn san.
De erstn Johr homs des woi á flutn und Seeschlachtn nachspuin kenna.

Und so hot des domois ausg’schaugt:

Auf am Bodn Steh oder Sitzn der 2000 Johr oid is, is á wos B’sonders.

De Gladiatoren war’n scheinbar “kloane” starke Kämpfer.

Mia hom uns olle Gänge genau o’gschaugt und san na wieda naus.

Des Kolosseum is á a tolle Kulisse fia Hochzeitspaare – zumindest wenn’s Weda basst.
Do war’s etz net ganz so schee und de Braut werd se hintnoch g’freit hom. Des Kleidl war nimmer ganz so weiss…

Bella Italia hoit

Bei de Schaftlacher is oiwe wos los und Vui machan mit und wenn’s na á no zu Ehren vom Herrgott is, na glei no vui liaba.
Dafia kriang ma ná a oiwei a schens Weda dafia – in Bayern nennt ma des “lebn und lebn lossn” – sigstas, da Herrgott vasteht des á!

Des Ross woas, dass den Wichtigsten dabeihot.

Mia brauchan uns net hinta Rom vastecka, bei uns kriagt á a Jeda sein Segn

Schee herg’richt san’s, de Leit und de Ross

Gell, do schaugst, de Rösser san á hintn schee!

Á de Touristen hom a richtige Freid g’habt

und de Weiber im echtn Dirndl san heit z’dog im Dascherl drin á modern ausgestattet – so a Selfie war vielleicht á wos g’wen

Á da Burgermoaster Hartl hot a guade Figur g’macht und g’freit se etz bestimmt auf an gmiatlichn Frühschoppn im Pfarrsaal – an Guatn!

Do moanst wenn’s vabei is, na is’ guat – Pfeiffadeckl!

In Italien is’ á so, dass de Leit mit’n Sarg in am Kasten in da Wand bestattet wern.
A jeda kafft se vorher so an Kastn fia den Fall der Fälle.

Wenn na Oana stirbt werd er erst amoi dahoam im Haus g’waschn, o’zong und auf’bart und dann san 3 Dog lang de b’stellt’n Klageweiba dró.
De san ganz in Schwarz mit Schleier, zeimlich laut und miass’n á nó zoit und vaköstigt wern. Na ja, drei Dog “Klóng” is á ziemlich anstrengend.
– Obwoi, wenn i ma do de Leit in da Arbat só o’schaug? – De wern á guat zoit und jammern nó länga.-

De Trauergäste kumman ná nóch und nóch, des Haus is oiso voi.

Da Mo von meina Freindin Louise is Sizilianer und sei Mama is letzts Johr g’storm. Da Papa hot vor 15 Johr zwoa Kästn nebanander fia d’Mama und eam kafft. Jeda hot 5000 Euro kost.

Nóch de Klageweiba is da Pfarrer kemma und es is mit vui Trá Rá in Richtung Friedhof ganga. De laare Platt’n is ob’gschraubt worn und auweh!, im Grob vo seiner Mama is scho a Sarg drin.
Olle hom bläd g’schaugt und hom se lautstark aufg’regt. Ja, wos is etz dés?
Olle, einschließlich Sarg und Pfarrer san wieder z’ruck zum Haus. Des muass ma se moi bildlich vorstelln!
Do is’ etz hoch herganga und da Renzo is mit de andern Männa zur Verwaltung ganga und es hot se rausg’stellt, dass do aus Vasehen a anderne Frau beerdigt worn is – ganz prima!
Jetzt hom’s mit de Vawandtn vo derá Frau redn miassn, weil so einfach geht des net. Wenn de net woin dass’d Mama vo dene, so g’seng, umbett’ werd, nacha bleibt’s wia’s is.
Dann liegt irgendwann da Baba vom Renzo neba na fremd’n Frau. Ja, soweit kimmt’s no…
Aber Gott sei Dank war’n de einsichtig. Aber de ganze Aktion hot natierle á nó a boor Dog dauert. Am letztn Urlaubsdog (14) vom Renzo hom`s endlich de Mama in’s richtige Grob nei doa kenna.

Ja, und deischt’s eich net, bei uns gibt`s sowos á….
de nächste G’schicht dazua kimmt extra

Friara is vo de Amerikaner glatt no wos g’scheit’s kemma. De hom nämlich ois Erste 1908 des Nationale Frauenkomitee gegründet.
Da Tramp (härt se fast ó wia Trampe) der werd se do bestimmt drüba ärgan – vielleicht erlosst er a Gesetz gegn Komitees?

Heit -2018- g’spannan de Weiberleit auf da ganzn Welt plötzlich dass’ de Hälfte vo da Menschheit san – ja sowos – do vareckst!

I hob an Späze vo mia g’frogt warum de Fraun á heit no benachteiligt wern – “ja weil se’s bewährt hot!” er hot’s bloss a bisl ernst g’moant – so a Depp!

In Tölz drübn beim Eikaffa hom se zwoa Männa untahoitn “ná, mei Oide braucht sowos net, de hot Hoor auf de Zähn”.

Unser Grundgesetz sogt “Männer und Frauen sind gleichberechtigt. Der Staat fördert die Durchsetzung der Gleichberechtigung…”.
Warum san dann vo 100 Politiker bloss 25e Fraun oder vo 100 Professoren bloss 30e oder vo de 60 reichstn Deitschn bloss 19e Frauen?

Im Internet san de Meinungen in olle Richtungen ganga
– 100 Jahre Frauenwahlrecht
do mechtn etz á de Schwuln mitfeian
– da Verein MÄGÜDA demonstriert gegen de Überweiblichung des Arbeitsmarktes
– immerhin – da Putin hot im Fernsehn extra a Gedicht fia de Fraun vortrong
– a Frau frogt “wie erkläre ich meiner Tochter, die bessere Noten hat, fleissiger ist, sich nicht in der Schule mit
Mitschülerinnen prügelt, dass wahrscheinlich einer der Jungs ihr Chef wird?

I kannt no 100 Sachan schreim, aber i glab ma sigt’s scho, er hot doch an Sinn der Weltfrauentag.
Stückl fia Stückl werd’s scho werdn…

Übrigns, I hob heia s’erste moi was davo mitkriagt. I hob an starkn Mo, der vatrogt á a starke Frau.

Mia hom ja grod de WM vo de Luftschiffer in Rottach.
I sog etz liaba ned wos mia bei dem Nama ois eifoin dat.
Starten deans bei da Kásarei, am Montog hob i amoi zuag’schaugt.

Etz woas I scho warum de sovui Parkplätz braucha, de hom an Haufn sperrigs Glump dabei.

S’Weda war nix aber da Sprecha hot g’sogt, des is de Luftschiffer grod recht.

Hargott sakra wos isn etz scho wieda?

Etz is ois beinand und iatz kennans a koide Luft in de Haut neiblosn.

Naa, der muass net Eckerlsteh, der muass zum Luftausgleich de Schlitz oiwe auf und zua macha – sozusagen der Nachfolger vom “Spritzbrunnenaufundzudreher”

langsam werd’s etz scho

Da oane hot an Arsch unt da andre obn, iatz versuacht da Wind des auszumbalanciern – a Jeda hängt ganz sché in de Seile drin und “E wie Einfach” is des grod net –

“luftige Höhe in Sicht” ? “Land in Sicht” wàr etz bläd oder?

Etz sicht ma erst amoi wia riesig de san

I glab ja ned, dass’ in dera winzign Kabine so warm is aber wos duat ma ned ois fia an scheena Ausblick

hob’s scho vaschrian, da Erste is scho im Woid vaschwundn

Z’erst hot’s ausg’schaugt wia wenn’s glei zuaziang dát?

Aba mia in Schoftla hom des scho vadient, des schéne Wéda, do hot er scho Recht da Petrus. Dafia hom se á Olle richtig in’ Zeig g’legt.
De Kinda hom g’schaugt dass Guatln dawischn

und de Sportler hom de Fahná g’schwenkt

De Bobfahra warn eingle in Pjönjang nominiert aber do is a so saukoit, do woitn’s na doch liaba in Schoftla mit

Olle warn’s auf de Fiass, a Jeda hot an Spass g’habt

Da Sepp fahrt oiwe hintnoch damit á koana valorn geht

De Hexn hom á ollerhand Unfug triem

naa, passiert is nix – es war ja glei a Häusl mit dabei – do sitzt na drin und schauklst gmiatle durch de Gegend

De Römer san á endlich in Schoftla o’kemma und hom glei des Pferdl vo Troja mitbrocht

Oha, etz gibt’s glei an Stau, de Kurvn is eng

guat is’ ganga

schaug dir blos des Weda ó

Oana fahrt sunst an Schneepfluag und rammt ois ausm Weg – desmoi hod a aba leider vagessn, dass a an foischn Wong hint nochziagt

Iaz samma do, etz gibt’s a Brotzeit

äha, beinah hättn oa nix kriagt. Guat dass de Römer a a Loata dabei g’habt hom

und iatz kimmt da gmiatliche Teil unterm weiß blauen Himme – so wia se’s g’härt

Mei Freindin Bigi ihr Mo und Bekannte warn in Griechenland in Kalamata im Urlaub.
Sonnenuntergang, griechisches Essen, Rotwein und Ouzo, des Lebn is doch schee – Stimmung pur.
“Do scha hi”, sogt da Lorenzo und zoagt noch Südn, “do is des Kreuz des Südens”.
De Bigi schaugt, “ui ja, du des bewegt se aba”?
“Geh Schmarrn, des bewegt se doch net!”
“Doch, scha hi des glitzert und kummt näher.”

“Wos du wieda sigst?”
De Bigi, “etz schaug doch hi, dei Kreuz des Südens werd a oiwe lauda” – WUMM –
“und iatz fliagt`s üba uns drüba”.
Olle homs g’lacht – des war natierle etz richtig in Dreck nei glangt
aber a Jeda vo dene woas etz genau wos des “Kreuz des Südens” is.

“Etz kimm hoit rüba, i druck da á an Zaun owe.”
“Na, liaba net du host oiwe nix wia Blädsinn im Kopf.”
“Etz zier de hoit net a so,

scha her, i hob scheene neie Schua. Rote wia da Papst hätt i gern g’habt aba de war’n scho vagriffn.”

“Hä, wos wui etz de?
Des is ja koa Wunder dass ma do zu nix net kimmt!
Wos is etz, kimmst rüba?”
“Naa, i mog net.”

“Ja na hoit net. Do miahst de owe und nix is dakennt – so san’s de Weiwa”

Heit am Dreikenigsdog woitn a Poor mit’n Ballon zum Himme auffe aber da Herrgott hot se denkt “wos, agrat heit kumman de mitn Feuerteufel daher?
Ja, des kimmt ja gar net in Frage. Da Teifi in da Höll drunt dat se kaputtlacha”.
Oiso hot er den Ballon wieder zu eam owedruckt.

Recht hot er!
Guat dass de Hl. Drei König domois mit de Kamele kemma san sunst wár’s nix worn mit Goid, Weihrach und Myrrhe fia’s Christkindl.

– do muass ma ja glei de Ästreicher zitiern.

An Sylvester warn mia in a na Kneipn, de kenn i no vo friara – da Flieger -. Vielleicht kennt da Oane und Andere no des Fliagaliad – ná, an Hans Albers hob i nimma kennt- “Flieger, grüß mir die Sonne, grüß mir die Sterne und grüß mir den Mond…” do singan heit no vui mit.

Beim Essen war’s lustig und g’schmeckt hot des Meiste á. Wia’s na auf 12e zuaganga is hom se Olle an Sekt und eanane Raketn g’schnappt.
Mia san in obern Stock auf’d Terassn auffe, do is Plotz und ma hot an scheena Blick.

Es is 12e worn und noch de Umarmungen hom ma de Raketn in Position brocht.
Kimmt do net so a Goass daher “das ist jetzt aber nicht ihr Ernst? Sie wollen doch hier nicht Raketen zünden?”
Ja wo denn sunst? Mia hom’s olle irritiert o’gschaugt und wo na da Wirt mit sein kloana Buam kemma is, hot sa se Gott sei Dank vazong.
(Do schreibe etz ausnahmsweis net, wos i ma denkt hob.)

Mia hom na zwischen Kinder-Feiawerk und Raketn des Spektakl genossn und san Olle lustig ins Neie Johr neikemma.

Und fia Olle mitnand á no a Guat’s Nei’s Johr 2018!