Monat: Juli 2017

Á heia war des Schlossfest z’ Hohaburg wieda richtig nett.
Draußd hod se S’Weda auf de Jahrhundertflut ei’gschossn und drin war’s richte zünfte.
De junga Leit hom Musi ‘macht dass de Fetzn g’flogn san – o.k. manchmoi war’s hint net b’sonders laut, aba so á Turnhalle is á schwar auszumsteian.

Weida vorn war da Sound fetzig und de RolliGang hot se á richte ins Zeig g’legt.
Lauta nette junge Leit und sie machan á guade Musi, schaugt’s amoi nei in youtube.

An Haufn Mädls spuin á richtig rockig E-Gitarr.

Es kost ja scho á Übawindung, dass ma voa so vui fremde Leit spuit und singt, aba de Junga hom des olle super hikriagt.

De kloana Quietschantn geht’s wia de Kinda, sie méng am liabstn Wasser. A jeda war ungedulde, de Kinda weils auf de Antn g’wart hom und de Antn, weil’s net glei ins Wasser derfn hom.

Endle kimmt de Erste – Zeit is’ worn

Z’erst hom’s as net dawartn kenna und iatz geht eana d’Hosn – “spring du zerst – ná du …” Des Gequietsche härt net auf bis olle endlich im Zui san.

Und iatz quaken de andern “puh, wiavui san an des no?”
Ja Recht macha konnst as nia net olle –
Obwoi, de Kinda hom de Großn zäin lossn und hom dawai wos scheenas g’macht

Schaukln

Angln

Karussei fahn

Stoana mischn

Und s’Weda? Des war direkt wurscht, Hauptsach de Großn hom se draußn wieda a moi austobn kenna

30° Hitz, a gfährliche Streck, a internationale Besetzung und unglaublich vui Publikum. Vo Porsche bis Ferrari – ois war dabei.

Oamoi im Lebn an Ferrari fahrn, fia den Woife war des genau des Richtige.

Trotz Startrampn hots a bisl zách o’gfanga

Im Fahralager is’ hoch her ganga, schließle braucht ma ja á de richtige Strategie

a so a Porsche is hoit scho a enge Kistn

s’Überholmanöver is grodnó guatganga

dazwischen gibt’s a Brotzeit

natirle perfekt kredenzt

Da Schneiste und dann dés, bei uns auf’m Land bassiert’s natirle schó amoi, dass do plötzle á Haiboin aufdaucht

De Buam übn nembei s’Schuaplattln fias Zelt – ja, glei fang ma ó …

schee war’s wieda amoi, wia’s Rennaz nausganga is des les ma na moing in da Zeitung, Hauptsach es hom olle a Riesngaudi g’habt.

…
Tja, ois hot seine Vor- und Nachteile,
währnd i do “in Monza” g’feiat hob, hot de Tine an Haufn Schwammal g’fundtn

de häd i á gern méng aba ois auf oamoi géht hoit nét

Koa Mensch schlaft, olle treibn se rum bei da Nocht!?
Ná, heia war des nét a so, regelrecht gmiatle war da Auftakt vo dem Säfest. Richtig warm war’s, übaroi host Plotz g’habt, nirgns is ma dabatzt worn – do geht an ja direkt wos ob?
Des Feiawerk war á speziell, a bisl kurz aba lauta neie Sachan und richtig pfundig.

De Flutung vo da Wiesn nebam Friedhof in Schaftlach war blos a Rinnsal übern Parkplotz und Brotzeit hots á koane gebn. Da Bürgermoasta Hartl hot g’sogt des guit blos fia de Einsatzkräfte – aha -.

Fia de Familie um de wos eingle geht war’s zwoamoi nix. Mit dera Flutung in de Kanäle nei is nix bewiesen – außer dass’ anders is wenn’s rengt.

Des Guate is, dass olle Leit mitnand an Dischkurs g’fiat hom, dass’ a só á net weida geht.

Bild entfernt

Es gibt á no de wo’s a bisl langsamer o’geh lossn,
do dafia gibts sogor eigns a Insel wo ma o’dockn ko wenn ma nimma mog

De Yogis san natirlich á dabei und de bringt so leicht nix aus da Rua

Bild entfernt

An richtign Sportsgeist hom aba á de Erwachsna. Drei war’n beim Großn Renna z’erst bei der erschtn Wendn. Oan hots owedaucht und de andern zwoa hom dann sogar auf den “Daucha” g’wart bis a wieda do war – und weida is ganga…

Olle hom ma g’latscht wei sowos is heit’z’dog äher seitn.

oder wia song eingle mia zu dene?
SUPler – na ja, SUPlerer gang á – wos is eingle do d’Suppn? Da Dägernsä´, ja der dát se schenstns bedanga.

Oiso de, de wo am Sonndog mit an grossn Páddl auf an Gummiboot am Dägernsä rumturnt san.
Etliche foin sowieso nei – und da Dägernsä is ächt koid – hächstns 5 Zantimeter, songs oiwe. Gschicht eana grod recht, wos miassn de á de Fisch und de Antn daschrecka.

Obwoi –
de Kinder hom se olle gfuit ois wia de Weltmoasta.

Bei da Kurzstreckn fia Kinda san zwoa Buam gleichzeitig ins Zui kemma und hom se riesig gfreit. Aba da Schiri hot gsogt, des wár a Fotofinish gwen und da oane war an Zantimeta schneia.
Da 1. woit aba mitn 2. teilen – “des geht net, da Compjuta nimmt des net ó “. Tja, de Kinda hättn ja scho an g’sundn Sportsgeist aba de Erwachsna…

Da längste Dog im Johr hot heia no a bisl länga dauert.

Scheens Weda is scho wos scheens aba Johanni hot verschom wern
miassn wega da Woidbrandgefahr.

Letztn Samstag iss’ na ganga. Aufm Woiberg homs aufgricht, saukoid wars und windig aber wia’s dunkl war iss’ na richtig hell worn.

Wia lafft des ob?
Eiane Kommentare kemman ois ersts in mei email nei und sonst nirgends.
I les de nachat und gib de frei, des hoasst i lösch de oda sie stengan dann im Blog.
Wenn jemand a Idee hot aber net wui dass sei Kommentar im Blog is, dann braucht a des blos dazuaschreibn. Dann lösch i den Kommentar, de Idee nimm i spater aber scho her – ausserdem, i schreib sowieso nix wos de Leit net woin.