jetzt kummt richtig Druck in den Kessel…

De Schweizer Bürger gengan fia’d Ukraine auf’d Straß – des is super!!

Aktuell dischkriert da Bundesrat vo de Schweizer dass’ auf eana Neutralität Richtung Russland vazichtn.
De Russischn Hochrangign ham in d Schweiz a Vermögn vo 20,5 Milliardn Euro.


(Ausdruck aus der FAZ-online von heit)

Wenn des jetzt eigfrorn wern dat, dann kriagat da Putin richtig Druck vo seine Gefolgsleit – de meng des sicha net, dass’ auf eana Geld nimma zuagreifn kenna!

Soo kannt’s geh?!

A` mindestns de Hälfte vo de Russischn Bürger woin den Kriag net und etliche gengan auf’d Strass – vui wern eigsperrt, aber wenn’s no vui mehra wern datn, kanntn ses nimma eisperrn weils einfach z’fui Leit warn.

I hoff einfach drauf, dass da Putin vo seine einga Leit entmachtet werd

des is ja schlimm…

Koa Mensch hätt glabt dass der Putin seit Jahren bloss oans im Kopf g’habt hot – Kriag!
De Krim war der 1. Schritt…

Lt. Putin bedroht des kloane Land Ukraine “Väterchen Russland” – is der im Kopf ausgstieng???
Oder hot er Angst, dass de Leit a Leben ohne Kriag und Angst gfoin kannt?

Mei persönliche Meinung is, dass de EU etz zoang muass dass’ a Staatnverbund is und net bloss lauta oanzelne Staatn de zufällig Nachbarn san.
Gegn den Kriagstreiba Putin miassn olle dem entgegntretn – am Bestn weltweit – es lafft scho o’…

Es wern á Probleme fia uns kemma, aba wenn se a Jeda á a bisl um Andane kümmert, wern ma dene Herr!

I beschäftig me seit üba 20 Johr mit Börsnanalyse –
do stellt se mia natierlich de Frage, wos is im Hinblick auf den Kriag in da Ukraine etz sinnvoll und wos net!?

Des Wichtigste is – koa Panik,
warum net?

Weil bei echte Krisen erst amoi ois runter geht und noch einige Dog wieda rauf.

I zoag eich a Schaubild wia des bei andana Krisn am US-Markt im Dow Jones ausg’schaugt hot (bei echte Krisn laffan fast olle wichtign Märkte gleich):

so kennt’s des lesn:
links de vaschiednen Krisn
nemm’ ma moi ois Beispui den Angriff auf Pearl Harbor 07.12.1941
am 1.Dog is da Markt um 3,8% ei’brocha de Dog drauf is weida oweganga, insgesamt hot da Markt am diafstn Punkt 19,8% valorn, bis se de Lage stabilisiert hot, hots domois 143 Dog dauert, bis ois wieda “beim oidn” war hots insgesamt 307 Dog dauert.

Wia is etz des ganz praktisch in Deitschland?

Mia treim Handl mit Russland, aber so dramatisch wia Vui moana is’ gar net

da Außenhandel (Einfuhr/Ausfuhr) mit Russland macht grod 2,3% aus

Wo kriang ma etz dann Probleme?

De Preise fia Öl und Gas wern kräftig steing (de Tankstelln hom des ois scho vorher g’wußt, da Preis fian Lita is etz bei 1,90e 😣)
de Lieferungen aus Russland san unsicher – und nochdem de russischn Bankn seit heit nimma im SWIFT- Banknsystem san – san de Lieferungen no unsichara,
de Deitsche bzw. EU Politik reagiert scho entsprechnd – es werd so schnei wia möglich a Lagersystem fia Gas und Öl baut…

Am Agrarmarkt gibts a große Unsicherheit,
Russland is Exportland fia große Mengen Ammoniumnitrat, Phosphor und Kali,
des hoaßt dass de Düngerpreise gewaltig steing wern
und dann in da Folge á de Preise fia Getreideerzeugnisse

de Ost-Ukraine exportiert große Mengen Gerste, Sonnenblumen-, Weizen- und Gerstenerzeugnisse,
wenn da Putin de Ost-Ukraine besetzt dann hot des Auswirkungen auf unserne Lebensmittelpreise in vui Bereiche

es gibt a guade Internetseitn fia Agrar:

https://www.agrarheute.com/markt/duengemittel/duengerpreise-neue-preisspirale-ukraine-krise-ausgeloest-590571

Olle tollen russischn Aktien – vui mit hohe Dividenden san owe grauscht und lodn uns zum Kauf ei…??

denkt’s dro dass de zwar “billig” ausschaung,
aber de politischn Risiken san immens

“schlimma geht imma”

schee dass er wieder dahoam is und mitheift

mei Mo war etz 3 Dog bei seim Bruada und is seit gestern wieda do.

Grod vorhin,
a mords Gschrei vom Loui (unsa Koda) im Schlafzimmer,
mia renna nei – a Vogl is an d’Scheim gflong und liegt dod am Bodn vom Balkon – super!
Da Loui wui naus und rennt immer wieder an d’Scheim hi.

Mei Mo, “des gibt etz a mords Sauerrei”.
I sog, “hoitn fest, i geh drüm naus”..

I hob den Vogl gnomma und in an Busch nausgschmissn – do konn se da Koda etz austobn, den findt er net…

I bin wieda ins Schlafzimmer, hob de Dir aufg’macht und da Loui hot gschrian und is um den Fleg wo da Vogl war, rumdanzt.
Zu meim Mo hob i gsogt, “I hobn owe gschmissn in den Busch, nimm’n und trogn owe”…

Mei Mo geht owe mit eam, trogtn zu dem Busch hi und sogt zum Koda “schau da is er doch”,
da Loui macht an Satz und oan Wischer und scho hot er’n.

Mei Mo schaugt rauf und sogt “Du, ich glaub der will rein mit ihm” – ah, geh?!

Lossn ja drauss!!!

Da Loui denkt se, endlich amoi a gscheida Christbaam
und iatz gäht er vo dem Busch mimma weg – vielleicht hängt j no a Vogl do drin?!

Und wer rammt etz den Saustoi weg?

I hob me umsunst aufgregt (dawei war i grod so mittn drin) – mei Mo hot ois sauber gmacht –
I bin doch froh, dass er wieder dahoam is!

a boor Infoseitn zum Vulkan und Klima

fois eich des Thema Vulkan, Klima usw. intressiert,
do san a boor Infoseitn auf dene i mi rumtreib…

beim Benjamin Claussner bin i fast jeden Dog, der macht ganz nette Videos – á vom Lebn drumrum.
Er is a Deitscha und lebt mit seina Familie auf La Palma.
Sei Blog hoasst “Bananeninsel”, den Nama auf youtube eigebn:

dann is do no a intressanter Blog:
“Gärtnerin aus Leidenschaft”

Sie und ihr Mo san á Deitsche de auf La Palma lebn. Sie san ganz am Anfang scho evakuiert worn, sie kennan aber in eanana einga Ferienwohnung wohna – wenigstens miassns net in a Hotelzimmer

Heit schaugt er ganz friedlich aus da Wäsch, da Herr Vulkan
(des grünlich-gelbe do in da Luft oder aufm Kegel is Schwefel! Sehr g’fährlich…)

… i hob me deischt, er hot se’s anderst übalegt – in da Vor-Weihnachtszeit woit er doch á a bisl leichtn

TV CANARIAS is übrigns á a toller Blog auf youtube,

ois nächsts is natierlich da “Copernicus” wichtig:

https://www.copernicus.eu/de

ois wos mit unsana Umwelt z’doa hot, übawachan de

dann gibts á no de Seitn “windy”,

https://www.windy.com/-SO2-tcso2?tcso2,28.979,-11.514,5
oder einfach auf Google suacha

de find i á super, do is rechts a Leistn, do konnst olles obfrong was mit Wind und Wetter z’doa hot

z.B. Luftströmungen

oder
Schneekartn usw.

dann schaug i á hin und wieder auf de Seitn “climmate.gov”

https://www.climate.gov/news-features/climate-qa/which-emits-more-carbon-dioxide-volcanoes-or-human-activities
oder auf Google sucha,
do gibt’s á immer wieder moi an intressantn Beitrog

ansonstn findt ma ja auf Google 1000e Sachan – ma miassat bloss de Zeit hom, dass ma se do durchsuacht…

a ruhiga Advent wàr des Hächste fia de…

net Olle hom des Glück, dass an ruhign Advent hom

auf da Insel La Palma wütet seit 75 Dog a Vulkan, da Cumbre Vieja.
Auf da Westseitn vo dera Insel hot se de Natur und des Lebn vo de Menschn und de Viecha komplett vaändat.

La Palma is a Vulkan-Insel, da letzte Ausbruch war vor rund 50 Johr.
A Jeda hot’s gwusst, dass wos bassiern kannt aber koana hot’s glabt dass des so schnei geht

De Inselbewohner lebn vom Gmias-, Obst- und Bananenanbau, des san riesige Plantagen
und a so schaugts aus de Insel (friara, vorm Vulkan)

wenn ma auf da Kartn links in da Mittn schaugt is do Tazacorte,
wenn ma vo do aus mitm Finger grod noch rechts bis ungefähr zur Mittn geht, do is der Cumbre Vieja.
Der is do gar net ei’zeichnet weil des war bisher bloss a normala Hügl.


(des Gelände links is da internationale Flughafen vo La Palma)

Etz schaugt des aber anders aus – am 11.09. is d’Erdn aufganga und donnert Lava, schwarzn Lavasand und Gase in Fontänen raus,
seit 75 Dog oiso dröhnt der Vulkan,
durch de vui’n Erdbebn (gestern 351 Stck, Magnitude zwischen 2.6 und 5.0 !) werd er immer wieda mit Magma g’speist…

Warnungen warn vorher scho do, aba koana hot g’wusst wann wos bassiert und wo? Weachana Krater geht z’erst auf??? Es war gar koana, es war einfach a Bergal

De seismischn Aktivitätn wern weltweit übawacht, aber meistns is ma erst hintnoch schlauer

(Epizentrum is da Mittlpunkt vo dem Ereignis,
Magnitude is de Stärke vom Erdbeben)

I schaug manchmoi auf de Seitn https://www.youtube.com/watch?v=rbGa1NPzGUk, des is a Übasicht üba weltweite Erdbebn

Bis heit kummt net nur Lava in gigantischn Mengen wia a Wasserfall raus (1163 ha Land san bis heit zuadeckt)

sondern á 15 000 Tonnen Kohlenstoffdioxid CO2 am Dog!! (Korrektur heit um 22.30h)

ein gigantischer Dreck überoi

de Pflanzn dasticka förmlich

ois is zuadeckt mit Lavastaub – á de Autos usw.

De Lava lafft unaufhoitsam wia a Woizn, sie schiabt se einfach üba ois drüber

de Lava-Wand is zwischen 8 und 16 Meter hoch

und vabrennt ois wos do im Weg is

Da Krisenstab richt immer dort Sperrzonen ei, wo da nächste Lavastrom erwart’ werd.
De Leit hom dann 4 Stundn Zeit ois mitz’nemma wos’ braucha. Danoch is de Gegnd Sperrzone, es derf koana mehr nei.
Möbe kumman in a Lager, de evakuiertn Leit kumman in Hotels (heit is Dog 75)
Fia dejenign Leit a totale Katastrophe…

wennst Glück host lafft de Lava um dei Haus rum

aba wos nützt da des?
Dei Haus steht no aba du konnst net nei – de Lava werd obn koid aba drunter lafft de weida…

mitlerweile is de Lava á scho an zwoa Stelln üba de Klippn ins Meer nei

von unten schaugt des a so aus

nei’s Land is entstandn
und wos hom de Leit ois ersts g’frogt?
Wem g’härt na etz der neie Grund?
De Insl hot se vagräßert, des Land g’härt oiso da Regierung vo Spanien

de Inselbewohner kennan leida bloss no zuaschaung und hoffn, dass des boid a End nimmt

I wünsch dene ois Guade und dass der Vulkan boid ruhiga werd und wieda ganz aufhärt

etz hob i lang nix mehr g’schriem…

I hob etz lang nix mehr g’schriem
weil ma konn á nirgns mehr hi

des Scheiss-corona geht ma echt aufn Geist!

I schreib etz hin und wieda über Sachan de woanders bassiern
oder wo i de letztn Johr war und nix drüba g’schriem hob.

Wenn Eich a Thema eifoit des Eich intressiert, schreibts ma’s einfach oda ruafts me ó

Da Advent hot o’gfanga, bei uns is tatsächlich amoi staad,
bei Andane is des net so – und des werd de nächste Gschicht…

Ohne Stress Französisch lerna – des geht!

Französisch?!
vo dem wos i domois in da Schui g’lernt hob war nimma vui do…

aba bloss koan Stress –
des is genau des wos i g’suacht hob – und i hob lang im Internet/VHS usw. g’suacht

Es gibt a Lernmethode nochm Dr.Stephen Krashen aus den USA und da Dr.Beniko Mason aus Japan de fia mi perfekt is:
Sprachen lerna wia de kloana Kinda – de paukn á net Vokabln und Grammatik,
sondern de härn einfach zua und schaung hi
und wenn’s gnua g’härt und g’seng hom dann fangans ò zum redn – und härn nimma auf…

es is aber natierle wichtig, dass des Themen san, de fia den Oanzeina intressant san – ma schaugt se ja bloss Sachan ò, de Oan intressiern – desweng hom’s ja à de Schuibiacha so schwar –
am Bestn is, ma suacht se de Videos aus de oan gfoin und vielleicht a no a französische Tageszeitung im Internet,
hin und wieda an Fuim auf ARTE in Französisch (des konn ma am Fernseher bei “Multi-Audio” ei’stein) und scho is ma mittndrin

es gibt im Internet vaschiedne Leit, de vaschiedne Sprachn noch dem System o’bietn

de Beste in Französisch, bei dera i à a Mitgliedschaft hob, is de Alice Ayel aus Paris (a Mama mit Mo und 5 Kinda)
aliceayel.com

ma konn se erst amoi bei youtube oschaung wia des aufbaut is


https://www.youtube.com/c/aliceayel/videos

des is absolut kostnlos
wenn ma noch untn scrollt siegt ma de ollererstn Videos usw.

bei da Mitgliedschaft – im Johr 25 Euro – san no Dausnd andre Sachan dabei

ma konn à Fragn stelln, des geht dann im Chat

a Menge Biacha, Info`s zu Fuim usw. san à dabei

wenn a Schüler/in etz no a bisl Grammatik wui gibt’s do vui Auswahl im Netz
i nimm manchmoi den cactus 2000

https://conjf.cactus2000.de/showverb.php?verb=penser

oder den reverso

im Bayrischn Fernsehn gibt’s á a Serie, de is zwar guat aba uroid

des is a so a Endlosschleife, im Moment sans bei Folge 13 von 39

und dann gibt’s no an guatn Anbieta der aba so um de 100 Euro pro Jahr kost
LingQ von Steve Kaufman

sehr modern und noch dem gleichn System von Krashen/Mason
do wer i ma späta moi a andane Sproch raussuacha…

Vielleicht nütztn eich de Informationen wos, i wünsch eich vui Spass damit

guade Infoseitn zu Covid19

vanünftige Info-Seitn san wichtig,
des san de wo mia in letzta Zeit aufg’foin san

z’vorderst intressiert me natierle mei Landkreis,
so a Info gibt’s á fia andane Landkreise

https://www.landkreis-miesbach.de/Bürgerservice/Aktuelles/index.php?La=1&object=tx,2823.2270.1&kat=&kuo=2&sub=0

schaugt’s moi untn rechts, do konn ma á seng weichane Impfstoffe grod doo san

da aktuelle Impfstatus intressiert me natierle á

https://impfdashboard.de/
de Impfuhr is nett…

da Corona-Impfindex is a Bericht über den Impfstatus mit Focus auf de Arztpraxn

https://www.zidatasciencelab.de/covidimpfindex/

des is a Seitn wo ma de Vabreitung der Covid-Mutationen beobachtn konn

https://covradar.net/germany/

und des do is a offizielle Info-Seitn vom Bayrischen Landesamt fia Gsundheit

https://www.lgl.bayern.de/gesundheit/infektionsschutz/infektionskrankheiten_a_z/coronavirus/karte_coronavirus/

losst`s Eich net varuckt macha, basst’s einfach a bisl auf Eich auf – langsam werd’s scho