Jahr: 2020

De 2te Corona-Welle lafft,
de Urlauber san z’ruck, de Zahln gengan nauf, aber – de Todesfälle bei uns bleim niedrig – bei Andre á

Warum is des so?

Da Hauptgrund werd woi sei, dass de Meistn vorsichtig san und de Infektionszahln damit langsamer steing.
Á de Vorbereitungen im Gesundheitswesn san besser und es is mehra getestet worn – de Infiziertn san á schneller in Quarantäne kemma. Außerdem kumman etz de Hausärzte und de Patientn besser mit dera Situation z’recht – a Jeda woaß etz worum’s geht!

Bei manche Länder schaugt des ois net so guat aus, de 2te Welle is zwar vabei aber de Todeszahln san hoch

Weltweit g’seng steing de Zahln immer no stark ó

In USA extreme Zahln,
á in Israel – do kummt wahrscheinle a neier Lockdown,
in Frankreich hom’s de hächstn Zahln seit’m Anfang vo dera Pandemie und
in Spanien á hohe Zahln und große Einschränkungen überoi

Oiso,
Leit bassd’s auf Eich auf und bleibt’s g’sund – de Zeit geht á vabei!

aba bass auf, dass’d net dasauf’st!

(Bundeszentrale für politische Bildung)

Im Juni 1831 fangt rd. 50km vor Sizilien as Meer ó zum Kocha – tagelang Rách, Dreck und gliáde Brockan…
Im August 1831 nachad war de Insl fertig – 5km lang und 63 Meter hoch – unglaublich!

Und wos bassiert etz, wenn plötzlich a neie Insl aufdaucht?

Richtig! – de Streiterei, wem’s g’härt geht sofort los!
De Anreiner-Staatn hom á glei Nama vagebn – da Deitsche Vulkanologe hot g’sogt de Insl hoaßt Ferdinandea, wia da Sizilianische König Ferdinand.
De Engländer hom g’sogt, de hoaßt Graham und
de Franzosn hom’s Giulia g’hoaßn…
Der Zwist is soweit ganga, dass de damalige Presse scho an Kriag kemma g’seng hot…

An Herrgott hot’s etz g’langt, er hot de Insl o’gschrian
“Insl, etz dua wos, sunst kimm i owe!”
Auweh, hot se d’Insl denkt, oiso guat, dann verschwindt i hoit wieda.

Do hom’s bläd g’schaugt, de Erdnbewohner – a hoib’s Johr späta war de Insl nimmer do!

De Insl is etz 8 Meter unter da Oberfläche und a Problem fia de Schifffahrt –
des hom’s etz davo – Recht g’schicht Eana!

Ma kannt moana etz is a Rua – aba nà, des werd no besser…

1987, in da Zeit wo de Amerikaner sauer war’n auf den Gaddafi san de Amerikaner mit a boor Kampfjets über Italien Richtung Lybien g’flong und hom bei Sizilien Rách aufsteing seng –
Schit – der Gaddafi hot do a UBoot vor Italien – ebba a Submarine Raketenabschussrampn??
Sie hom net lang g’facklt und hom des “UBoot” bombadiert –
tja – etz war de Insl erst recht sauer, de Presse hot an Maulkorb kriagt, aber der Rest vo da Welt hot g’lacht – de Amerikaner war’n scho oiwei ganz toll…

An’am italienischn Arzt, dem Domenico Macaluso, is des 2002 dann olles z’bläd worn und er hot se denkt, wos gla’m denn de Deppn olle, i schraub etz do a Dófe hi – na is endlich a Ruah!

Auf dera Dófe steht “Dieses Stück Land, einst Ferdinandea genannt, gehörte dem Volk Siziliens und wird ihm immer gehören” – ois klar?!

Komischerweise war de Dófe kurz drauf in Trümmer zerschlong, da Macaluso is oiwe no narrisch und verdächtigt seitdem “fremde Mächte”, Anderne son’g, des war a Anker von an Schiff oder so –

I hoff ja, dass de Insl ihr’n Humor b’hoit und irgendwann wieda auftaucht, und i schreib nachad an Teil Zwoa vo dera G’schicht – do g’frei i mi etz scho drauf…

… der war glei wieda besetzt!
(Fortsetzung von “in dem oan Jahrhundert bist da Held”)

A junge Schwarze, de Jen Reid, hot se do in Siegerpose draufg’steit, da Künstler Marc Quinn hot des g’seng und hot des glei ois Vorlage fia a Statue aus Stahl und Harz herg’nomma.

Kurze Zeit drauf hom’s de Statue dann auf dem Plotz vo dem Edward Colston aufg’stellt.

Glei drauf hom’s dem Künstler na unterstellt, dass a des bloss g’macht hot, damit er no bekannter werd und damit á no Geld macht…

Des Aufstelln und de Debatte danoch war ois in oam Dog – olle hom se austobt – á de Stadtverwaltung,

dene hot’s dann g’langt und sie hom de Statue Omds wieda obg’rissn – schod…

de Arbeiter wern se scho á eanan Teil denkt hom…

vorsichtig gell – sunst kumman ois nächsts de “MeToo”…

Die Jen Reid war aber trotzdem stolz auf de Aktion

und der Künstler Marc Quinn hot wahrscheinlich an neien “Klick”-Rekord im Internet aufg’stellt

im nächstn kriagst Farb in’s G’sicht

Aber ois da Reih noch –

vui Staaten hom se Jahrhunderte lang eanan Reichtum mit dem Handel vo Sklaven ermöglicht und des war’n lauter “Schwarze”.
Ois Kinda und junge Leit san’s vaschleppt und dann eana Lebn lang schlecht behandlt worn.

De wo mit da Hilfe vo Slaven b’sonders erfolgreich worn san, dene hot ma na a Denkmoi g’setzt!

I bin ja gern in fremde Städte und hob scho vui Denkmäler g’seng,
fia mi san des aber einfach nur zeitgeschichtliche Gegenstände,
die a Wertehaltung in a na bestimmtn Epoche darstelln.

Des wos aber so in letzter Zeit ois bassiert is, des hot scho á sein Grund.
D’Amerikanische Polizei hot zum “Tausendstn moi” an wehrlosn Schwarzen umbrocht und des war da Auslöser fia de “Black Lives Matter”- Bewegung.
(Se beschreim se selber ois “Black’s”, desweng sog i oiwe no “Schwarze”…)

Oane vo dene vui’n Statuen is de vo dem Sklavenhändler Edward Colston (17.Jh.) und steht in da Hafenstadt Bristol im Südwesten vo England.

– schaugt harmlos drei – war er aber net!

De “Black Lives Matter”- Bewegung is mit jedm Übergriff vo Polizistn – hauptsächlich in Amerika – weltweit immer stärker worn.
Und der Zorn hot se auf vui Artn entlodn

Den Edward Colston hom dann hauptsächlich Weisse niederg’rissn und beschmiert –
vielleicht hom jetzt a vui Weisse vastandtn, dass mia Olle afrikanische Wurzln in unsra DNA hom –
und ohne de Einsicht der Weißn ändert se fia de Schwarz’n gar nix

und dann im Avon versenkt

Á da Bürgermoaster vo Bristol hot übrigns zuag’schaugt.

Nochdem se dann vui “Honoratioren” der Stodt über den Vandalismus beschwert hom, homs’n wieda rausg’fischt und vaschwind’n lossn

Weltweit san no mehra Statuen “bekämpft” und zerstört worn – do is oiso wos in Gang kemma…

weida geht’s im nächstn Beitrag “… und wos is etz mit dem laar’n Sockel?”

könnt’s eich no erinnern wia des Gfui is, wenn’ts irgendwo in da Stodt auf’s Häusl miassts? Baah, pfui Deife, mia graust’s do jed’s moi!

Anscheinend geht’s de Leit in Tokio/Japan á so und dene is etz z’bläd worn.
De hom dann an berühmtn Architektn angaschiert, der se do moi wos ei’foin lossn soit…
Hot er á g’macht, da Herr Shigeru Ban –
zwoa von seine durchsichtign Klo-Haisl stengan scho in an Einkaufsviertl in Shibuya/Tokio – 15e kemma no dazua –
genau – durchsichtige Haisln!

So, iatz geht de Fantasie mit uns durch – oda?

Super, des fehlt ma etz grod no, dass do a jeda zuaschaugt…

Etz hobt’s eich net so! De Japaner stelln se á net so ó –

Náá, ganz so schlimm is nét.

Wos de Leit bisher am meistn g’stört hot war da Dreck, da G’stank und überhaupt – de düstern Eckn wo de Klos bisher g’standtn san.
Oiso hot se da Architekt denkt “es werde Licht” – des mit dem “sauber” des stellt se erst no raus…

und no wos, de Japaner meng se á net zuaschaung lossn –
des san pastellfarbige Glaswänd de se mit Strom zu Muichglos vaändern, wenn ma des Klo zuasparrt

bóóh, des wár ja etz wos g’wen…

fesch sans ja scho
und schee hell is á drumrum

tja, do hot a etz Pech g’habt der Hammé!

Ja, und wos is etz wenn da Strom ausfoit?
Da Architekt sogt, koa Problem, dann werd des Muichglos einfach nimmer durchsichtig – aha, wahrscheinlich muasst na á glei im Klo übernachtn?

Bläd is’ ja bloss, wenn’s da pressiert und du vagisst zum zuasparrn,

oder wenn’st kloane Kinder dabei host, de wo oiwe wieda “auf- und zuasparrn spuin” während du aufm Klo hockst – dann hom de Andern á an Spass!

Aber sunst – schaugt des doch ganz passabl aus fia a so a Häusl in da Stodt

Übrigens der Shigeru Ban is oana von de ganz “Großen” Architekten, der is weltweit nochg’frogt

Beispiel in Frankreich, Boulogne-Billancourt

oder des Dach vom Centre Pompidou in Metz/Frankreich usw.

Mei Freindin Paula hot an liabn kloana Enkl, den Maxi – der is a etz fast zwoa Johr.

Er is am Übn dass er selber brav auf’s Klo geht, des klappt ganz guat – außer er spuit irgndwos ganz intensiv, dann g’langt de Zeit hoit manchmoi nimmer.

Mia sitzn im Gartn beinand – großer Abstand mit Maskn – und Ratschn, tringan Kaffee und g’frein uns über des scheene Weda.
Nembei schaung ma am Maxi zua wia a im Gartn mit seim Bobbycar umanandafahrt.

Plötzle steigt er ob und hupft von oam Fuass aufn andern.

De Paula geht hi “muasst du bieseen?” Ja, Oma derf i bei de Bleame bieseen?
Ja, freilich derft du de Bleame giaßn – olle hom ma g’lacht.
Mia Ratschn weida, da Maxi geht Richtung Wiesn und stellt se hi…

Auf oamoi schreit de Paula
Neiiin !! doch net in’ Schnittlauch nei !
und rennt los, mia kriang uns nimma ei vor lauter Lacha…

Da Maxi is sichtlich irritiert – d’Oma rennt auf eam zua und mia lacha Olle – er hot doch etz wirkle nix o’gstellt!
Naa, hot er net, Olles guat!
Ois Kloana hot ma’s fei á net leicht…

In Deitschland hom ma jetzt a stabile und hoffentlich kontrollierte Entwicklung, in de Staaten breitet se des Virus jetzt rasant aufm Land aus –

da Präsident sogt, des härt von alloa wieda auf- grundsätzlich hot er do scho recht – noch Jahren, wenn de meistn tot san, härt’s von alloa wieda auf…

Wenn ma jetzt amoi de Entwicklung von Pandemien o’schaugt, is’ tatsächlich a so:

grundsätzlich lafft des in 3 Wellen in unterschiedlicher Stärke ob und dauerd rd. 18 Monat

Die sog. “Spanische Grippe” war von 1918 bis 1920 und hot zwischn 20 und 50 Millionen Leit umbrocht – mehra ois da ganze I. Weltkriag mit 20 Millionen Tote

De Schweinegrippe war von 2009 bis 2010 und hot 19 000 Tote verursacht

Oans is immer gleich – es lafft in starke und weniger starke Wellen ob – des liegt a do dro, dass de Virologen und Mediziner dazualerna und de Leit mehra oder weniga de Empfehlungen der Politik foing

den Unterschied siegt ma a heit – in Schweden homs ois laffa lossn, Ergebnis 9% Tote (Deitschland rd. 5% Tote)
in den USA glabt der Präsident heit no an a fake-news, Ergebnis oiwe no extrem steignde Zahln – koa Entspannung in Sicht!

Und Gratler sans no dazua-
De Trump-Regierung hot weltweit olle Corona-Medikamente Remdesivir aufkafft

Bei uns geht de Hoffnung mehra in Richtung Impfstoff von BioNtech und Pfizer

web.de

woi ma’s moi hoffn, dass dó dann á net wieda ois de Amerikaner weg-kaffan!

I bin ja hoibat in Minga und Schaftlach aufg’wachsn.
Wia i dann so 12,13 Johr war hob i jeds Wochnende am Freitog mitm Zug zur Oma noch Sfl und am Sonntog Omd um 18.30 h wieda hoam noch Minga fahrn derfn.
Domois war des net so g’fährlich wia heit.
I bin immer im 1. Wagon noch da Lok g’sessn, weil dann bin i am Hauptbahnhof schneller zur Trambahn kumma.

Am Sonntog den 8. Juni 1975 (i war 17e) renn i um Viertl noch 6e zum Bahnhof in Sfl
i bin spat dro, i láf glei über de Gleise zum Zug und in dem Moment wo i drin bin, fahrt der á glei los – uff, des war knapp!

In Minga dann zack, zack zur Trambahn und hoam.
D’Mama macht ma Tür auf und starrt me kaasweis mit vaheulte Aung ó – wo kimmst du etz her? Wo warst du? Mit wem bist du hoamg’fahrn? – ois auf oamoi.
Ja, vo da Oma und mitm Zug – i bin genervt.
Etz erzähl ma koan Schmarrn, schaug amoi hi in Fernseher –
i drah me um und im Fernseher kummt des Unglück vom Zug vo Schaftlach noch Minga- hä?

des Buidl vo da SZ

des Buidl vom Merkur

Bei mir geht im Kopf ois durchananda – mit welcham Zug bin etz i do g’fahrn?
D’Mama – i bin ja froh dass’d lebst aber etz sogst du sofort wo und mit wem du am Wochnende fuat warst – da Baba hot á scho vo Soizburg aus o’gruafa!
(Und des hoaßt wos, der war unglaublich geizig)

Dazwischn leit permanent s’Telefon – wo is d’Elli? War de in dem Zug? Is ihra wos bassiert?
Olle de wo g`wußt ham dass i am Wochnende oiwe in Sfl bin hom o’gruafa – und des war’n fei Vui.

Danoch hob i überlegt wia`s des gibt – i war ja in dem Zug!!
D’Mama war froh dass i g’sund war aber sie hot mir koa Wort g’labt, da Baba á net – Koana!

Am nächstn Dog hot se rausg’stellt dass de Bahn wega dem IVV-Wandertag (Internationaler Volkssport Verband) an zwoatn Zug eig’setzt hot – i bin oiso aus vasehn in den foischn Zug eig’stieng – des muass ma se moi vorstelln – I fahr do jede Woch um de gleiche Zeit…

Oiso des war mehra ois “a guata Schutzengl” des war scho a Fügung vo ganz O’m

Zwoa Dog späda war da Baba wieda dahoam und hot g`sogt “do konnst etz glei nommoi Geburtsdog feiern” – i hobn scho meng mein Baba!

des is no a Artikel aus da Tegernseer Stimme

Etz is’ soweit, jetzt konn i bloss no Buidln von “Friara” nemma – i g’här ja zu dene de vorsichtig sei miassn…

Oiso im November letzt’s Johr hob i mit a paar nette Fotografn a Nacht-Tour in den Münchner Untergrund g’macht,
bisher war d’U-Bahn fia mi a Ort wo i schnei nei, hoffntlich glei weida und schnei wieda raus bin.

Mit dem ganzn Foto-Equipement und hin und wieda in Begleitung vo da U-Bahn-Polizei und vor Allem – fast ohne Fahrgäste – war des plötzlich ganz anders.
O’gfangt hom ma am Sankt-Quirin-Platz mia warn Olle überrascht wia ruhig dass’ do untn in da Nocht is

Oiso z’erst hom ma auspackt, Foto herg’richt, an Rundgang g’macht und dann hot uns da Mathias (Profifotograf) ei’gstimmt auf des Thema “U-Bahn aus künstlerischer Sicht” dann hom ma uns verteilt und losg’legt

wenn ma etz den Spiegel von der Kamara hochklappt und dann Bewegungen mit dem Foto macht schaugt des z.B. so aus:

i hob bestimmt a dreiviertl Stund Versuche g’macht bis i endlich de fahrende U-Bahn richtig draufkriagt hob

des war etz unser 1. Station
und mia hom uns langsam “ei’gschossn”

Vielleicht frogt’s ihr eich á, wos etz do an da Börse los is?

Mia hom ja oiwe no Corona, aber de Leit de an da Börse investiern stört des anscheinend net so – na ja, es san ja hauptsächlich de Großn wia de Staaten, Fonds, Versicherungen usw.

Und wieso steing etz de Kurse oiwe weida?

De Zentralbanken, in da EU de EZB und im gräßtn Markt (US-Börsen) de FED überflutn de Märkte mit Hunderte von Millionen.
Etz gibt’s zwoa Möglichkeitn

entweder de Leit nemma’s zum verbraucha – oiso zum ei’kaffa wos ma zum Lebn sowieso braucht – dann kannt sei, dass de Inflation steigt
oder ma gibt de Euros und Dollar de Firmen und Leit dass eanane Schuidn zoin und eanane Mitarbeita weida beschäftign kenna und vielleicht á no in de Zukunft investiern kenna,
in Deitschland leng de Leit des Geld a einfach zruck – Sparquote momentan 20% !!

In Amerika schaugt des grod a so aus:
De hom etz 30 Millionen neie Arbeitslose und Jeda kriant normalerweis 300 $,
da Trump hot bestimmt, dass a Jeda zusätzlich 600 $ kriagt – und des in da Woch !!!
De normaln Leit hom oiso im Monat plötzlich 3600 $ netto –
do miassn de in de Kranknhäuser fei vui Überstundn macha, dass des vadiena…

Wos dean etz de amerikanischn Arbeitslosn mit so vui Geld?
Sie kaffan Aktien wia bläd –
da US-Broker (Bankhaus für Aktien, Derivate usw.) “Robinhood” hot im Mai 800 000 Neuanträge auf a Broker Depot kriagt,
de woin do olle zocken – oder wia? Na ja…

Tatsache is
mia hom jetzt in fast olle Deitschn und US Märkte Höchststände
der Aktienmarkt hot se in a na gigantischen “Geldmengenblase” (so sog i dazua)
von da Realwitschaft (echte Bewertung von Aktien und anderne Werte) abgekoppelt

und zwar no vui häher ois noch dem Crash von 2000
– bei dem Buidl geht’s um des Kurs Gewinn Verhältnis im DAX vom 05.06.2000 bis zum 03.06.2020 – P/E Ratio is da amerikanische Begriff dazua -.

Des P/E Ratio von 19,7 sogt, dass wenn ma am 03.06.20 1 Anteil vom DAX kafft hätt, dat er se (unter gleiche Bedingungen) in 19,7 Johr amortisiern –
des hoaßt der Anteil is vui z’deia fia de DAX-Aktien wo do drinstecka – normal is um de 12e

So wia i des sieg, platzt de Blosn spätestns wenn de echtn Unternehmenszahlen fia’s II. Quartal 2020 rauskemma
und dann werd dees richtig heftig