Oberland Gschichtn

mia hom Glück g’habt,
á am letztn Dog hots leicht g’rengt,
wieda wenig Leit untawegs

mia san bergauf g’fahrn in Verona, i woit zu dem rundn Mausoleum?? aufn Berg, des ma vo untn so schee g’seng hot.
A engs Strassl zig Kurvn, wo ma obn warn, a Militäranlage oda sowos? Mist, des Google Maps is á net so da Hit!
Wieda a Stückl owe, do is links a mini-Tor – oiso nomoi zig enge Kurvn nauf, dann a Tor, do geht’s etz nimma weida, vui freie Parkplätz – super

komisch, des “Mausoleum” is do gar net,
da Georg, “jetzt bleiben wir erst mal hier”

mitlerweile wiss’ma á wo ma san,- es war wia bei de So-Wo-Samma-Neger vom Fredl Fesl,
San Pietro in Castello mit ana wunderbaren Aussicht, echt schee do herom

und do drübn wàr etz des wo i eingle hi woit

da Ausblick is grandios

des is de Brücke von Castelvecchio

do mog i á no hi
aber z’erst miass ma de 1000 Treppn owe

mia gengan üba de Brückn nüba und dann samma in am Stadtteil wo ma no nia warn und stengan vor dera Säule

komisch, den Duomo hom ma no nia g’seng? Mia warn doch letzts moi scho im Dom in da Altstadt??

Von außn macht der nix her, aber innen
WOW, des is unglaublich

des is der Altar vor der Kuppel

de Orgel rechts, links gibts á nó a wunderscheene Orgel

de Seitenaltäre san unfassbar schee

dann geht’s no weida ins Baptistero und
in a historische Ausgrabungs-Ausstellung

des is der Boden der Original-Kirche

oiso der Dom konn’s leicht mit Rom aufnemma
des is a komplette Dom-Anlage mit drei wunderbare Kirchen

draußn da Erzengl Gabriel (i woass nimma welchana Engl des war)

iatz no an café und dann wieda nauf zum Auto
oh,oh de 1000 Stufn – kanntst du net as Auto hoin?
nein, könnt ich nicht, (des valiabt sei hot anscheinend á irgndwann a End)

es gibt drübn auf da andern Seitn a Funicolare (Seilbahn) in de Oberstadt,
Gott sei Dank muass i net naufgeh, i bin no total geflasht vo dem grandiosn Dom…

a letzta Blick zum San Pietro in Castello
und nauf geht’s

IMG_6179

rechts oben sigt ma mei Mausoleum wo koans is – des
Santuario Madonna di Lourdes
kummt nächsts moi dro wenn ma wieda noch Verona fahrn

… wia g’sogt es hot g’rengt aber es hot leicht 26° ghabt
mia hom auf da Terassn – oa Meter war net unter Wasser – g’frühstückt und übalegt.
Na is mia ei’gfoin dass’ do irgndwo a bsondane Kirch gibt, ja genau am Monte Baldo, do woit i scho oiwe a moi hi abar nia hots basst.
Auf geht’s noch Spiazzi, des is a Fahrt vo 25 Minutn und dort gibts Parkplätz, danoch geh ma z’Fuass noch untn.

Da Reng is oiwe stärka worn und mia fahrn, grob gseng, in Richtung Gardasee.
Auf da Autobahn stehts Wasser, so dass ma bloss no 40e fahrn kenna.
Des Wasser vo obn kummt ois wia wenn oana ganze Eimer über oam auslahrt, da Scheibnwischer lafft auf Stufe 2oa und packts nimma. Do wenn ma etz dort san kemma glei wieda zruck fahrn, so ein Sch…

Noch rd. 1,5 Std. samma endlich dort und da Reng is a bisl weniger worn, etz park ma erst a moi…
Wanderschua, Rengjackn, Schirm ois hom ma o’zong oda dabei – und los geht’s

da Weg is stoanig und steil noch untn, mia gengan zur Madonna della Corona (Krone), a ganz a außergewöhnliche Kirche.
Und siehe da, da Reng härt auf und wos des Beste is, es san kám Leit unterwegs, is ja genial

am Wanderweg entlang is da Kreuzweg Christi mit große Fuguren aus Bronze dargstellt

Mia gengan so dahi und plötzle här ma durch de Baam und s’Gebüsch de lauten Gesänge vo da heilign Messe
und zwoa Kurvn weida seng ma’s na

es is absolut faszinierend, do konn i mi gar net sattseng
der Anblick, de frisch gwaschne Natur, de klare Luft und de Hl. Messe live

direkt in den Felsn neibaut, unglaublich

es war ganz schee anstrengend, aber do geh ma etz á no nauf

z’erst no wartn, bis de Messe gor is, dann kemma nei

absolut einzigartig, i mog gar nimmer weg
und überhaupt den ganzn Weg bergauf zruck – des werd a Problem…

ganz obn im Buidl sigt ma an Teil vom Weg wo ma kemma san – i hob net gwußt dass mia direkt üba da Kirch ganga san (Gott sei Dank, sunst hätt i mein Photo auspackt)

manchmoi hob i einfach Dusel, do gibts a Ringlinie mit an mini-EBus der fast genau an unserm Parkplotz a Hoitestell hot, do bin i etz echt dankbar

g’rengt hots mitlerweile nimmer oiso hom mia no de Gegnd a bisl erkundet und san dann wieder noch Verona zruck – Fahrzeit 20 Min

im Hintergrund da Gardasee

schee war’s, do glab i mog i irgendwann nomoi her

Mia warn a´ heier wieder in Verona
und mia findn a´ immer wieder wos Neis

des Appartment war etz net so toll, aber mia san ja sowieso de meiste Zeit unterwegs

den erstn Café hots uns na glei direkt wegschwemmt – des geht ja scho guat ó

á in Verona hots anscheiend de letzte Zeit jeden Dog g’rengt,
aber do hots danoch oiwe no 27°, oiso net wia bei uns

de Etsch is ziemlich voi, de Uferprommenadn á

In da Altstadt merkst etz do net so vui,

es is warm 29°, bunt und fröhlich

a so a Hoazat mitm Ferrari hätt mia á gfoin

Sightseeing, schene Plätz und Kirchn, da Dog geht schnei rum

San Giovanni in Foro

a schlichte aber sehr beeindrucknde Kirch

Omds war i na in da Arena bei Turandot von Giacomo Puccini, da Georg is dawei spaziern ganga

immer wieder a wunderbares Erlebnis

Am nächstn Dog hots in da Fria scho g’rengt, supa, wos dea ma etz?

Weiter im nächsten Beitrag…

Im April hom ma genau zwoa Dog Somma g’habt,
und an dem Samstog hom mia uns s’erste moi nóch Corona wieda zum fotografiern troffa

da Himme war ohne jede Woikn und es hot 26° g’habt, mia hom uns Olle g’freit dass ma so a tolls Weda ham

am ZOB in Miga hom ma uns troffn und woitn hauptsächle de Hackerbruckn fotografiern,
los geht’s

des is quasi überm ZOB

des is auf da andern Seitn vom ZOB
wo i domois no Taxigfahrn bin, hots de ganze Gegnd no gar net gebn

de Hackkerbruckn de hot scho wos, de junga Leit meng de á

fia a guads Buidl is uns koa Gefahr net z’groß

wia na d’Sonna weida runterganga is san ma stadtauswärts Richtung Donnersberger Bruckn zum Fuassgängaüberweg ganga

de Scheim war saudreckad aba es is trotzdem a netts Buidl worn

Richtung Fuassgängerbruckn über de Gleise

auf da Bruckn san a boor so junge Kerle rumg’lungert
Oana von uns is mitn Photo in de Richtung vo dene ganga und hot rundrum fotografiert

a so a junga Kerl hotn dann o’pöblt er soi “gehen, wir wollen das nicht”
mia hom gmerkt dass’ do a Problem gibt und san Olle plötzlich auf unsan Speze zuaganga
und siehe da – der vorlaute Typ war recht freindlich, “nein, nix Problem”

oiso ois wunderbar

mia hom dann an der Donnersberger Bruckn no a boor Trick-Fotos gmacht und san dann langsam Olle wieda hoam

wos fia a scheene Foto-Tour

extra Dank an unsern Profi-Fotographen Benno,
bis zum nächstn moi

gestern Omd hob i nomoi a schéns Naturschauspui beobacht

i bin kurz aufn Balkon und in dem Moment is aus a na Woikn a Blitz rauskemma
und de ganze Woikn war doghell

i hob ma denkt, auweh etz gibt’s glei a Gwitter – foisch denkt,

es is olle 2a Minutn a Blitz nur in dera Woikn passiert
iatz hob i s’Handy raus

es war unglaublich
es war ganz staad, koa oanziger Donner, koa Reng, Sterne am Himme, de Hund bellen, sunst nix
und immer wieder a Blitz in dera Woikn

des Ganze is a hoibe Stund so ganga, dann hot se de Woikn langsam aufglöst
a absoluta Zuafoi dass i des gseng hob
aba vielleicht gibt’s ja sowos eftas?

i hob me no immer net erhoit, es war unglaublich

o’ganga is ja eingle mit de Meldunga vo NOAA, dem Space Weather Prediction Center,
de beste Vorhersageseitn fia Sonneneruptionen wo i kenn (hob i am Donnersdog ois g’schriebn..)

und dann is’ Freitog worn, i hob um 10e auf d’Nocht nausgschaugt und i hob ma denkt “des dauert no, fois’ überhaupt wos werd”
i hob á nix herg’richt weil i eingle net recht dro glabt hob

um 11e bin i an Balkon naus und hob wos schimmern seng, so a grünliches Schimmern wia i vo Norwegn kennt hob – Boohh, wo is mei Nikon 750e?? Hoi ma moi bitte des Stativ! Host du mei Stativ-Plattn gseng? Wo is mei Weitwinkelobjektiv? Scheisse, i hob koan Akku glodn.

Wo is mei Händi? Wia is des nomoi ganga mit Weitwinkl und Langzeit? Mist.. Mist..

Des absolute Gefühlschaos – i woit do net weg aba i hob ja mei Zeigl zamsuacha miassn.

I war am Balkon und hob me vor lauter Schaung nimma eikriagt – ohne Jackn, ohne Schua usw. i hobs gar net gmerkt.

zerst a Foto-Unfoi

Und dann hot doch des 1. Händi-Foto klappt

Da Georg war á begeistert aber um hoibe Oans hot er dann gsogt, i geh etz ins Bett – naa, i geh etz auf koan Foi ins Bett, des werd ja jetzt erst no richtig..

es war einfach toll
i war oiwe no am Balkon

dazwischn bin i nei und hob am PC de Seitn vo Foto-Webcam.org aufg’macht und an Tegernsee hergsuacht

des hot me dann total von de Sockn grissn
um uns rum a oanziger Farbnsturm

und dann is’ langsam ins lila neiganga

es is na mittlerweile so hoibe 3 rum gwesn
wieda a Blick auf de Foto-webcams
Bohh, des glab i etz net

absolut olle Berge homs in des tiafe Rot neidaucht

und so is des weidaganga

es war einfach nur toll!!
I bin dann umra hoibe Fünfe ins Bett und war einfach bloss froh dass i sowos Scheens dalebt hob.

Nochdem de Spitzn vo dem aktuelln Sonnenzyklus no gar net erreicht is, kannt mit vui Glück sei, dass’ heia nommoi so a Nocht gibt – schaung ma moi, na seng ma’s scho

Konn des sei dass mia Polarlichter seng kenna?

Febr. 2023 um den Mont-Saint-Michel

Woher kumman eingle Polarlichter?

De Sonna schleidert bei na Sonneneruption glodne Teilchen ins All. Je nochdem wo der Ausbruch auf da Sonna is, triffts de Erde oda á net.

Heit Nocht warn 3 ganz extreme Ausbrüche hintranander auf da Sonna – und de warn in Richtung Erde

(der kloane Fleck rechts obn is de Erde zum Vergleich)

noch de Daten soi der Plasmastrom no gräßer g’wesn sei ois wia der beim sog. Carrington Sonnenfleck

der Carrington Sonnenfleck war 1859 und der war so stark, dass Telegrafenleitungen beschädigt worn san und a des Papier vo de Telegram-Streifn durch kloane Funkn brennt hot – und scho vabrennan ole emails, ja furchtbar! – oda doch net?
Domois homs de Polarlichta sogar bis noch Rom seng kenna.

Wann etz nacha?

Ganz praktisch hoaßt des etz, dass in der Nocht vom 10.5. aufn 11.5. um 2h Früh +/- 6 Stunden a riesiger Plasmastrom auf unsern Planetn trifft.
De im Nordn vo Deitschland hom ganz gwiss Nordlichta, ob des bis in Südn glangt muass ma seng, vielleicht hom ma Glück

es gibt vui Internetseitn über Aurora prediction,
des is oane de i oiwe im Blick hob

im Helioviewer.org schaug i a gern nei

(re obn do san mia)

Oiso etz legt’s eich auf de Lauer, vielleicht hot da Oane oda Andane Glück und konn de Aurora Borealis seng ohne dass er noch Norwegn fahrt

Ps: Wenn’s Jemand intressiert sog i eam de Internetseitn wo i vui neischaug

üba Chat GPT redn Vui,
wos is etz des?
Es is a sprachbasiertes Tool im Rahmen da künstlichn Intelligenz des Ende 2022 vo da Firma OpenAI aufn Markt brocht worn is.
Im erstn Monat hom des über 100 Mio aktive Nutza weltweit hergnomma.
Microsoft hot 10 Milliardn Dollar an OpenAI bereitgstellt fia de Weidaentwicklung.
Google woit a eigne Platform aufbaun, de erstn Vasuche san aba glei in d’Hosn ganga ha ha…

Do bin i ja platt, do schaug i etz z’erst a moi noch, wos des fia a Firma is –

OpenAI macht koane Open Source Anwendunga, sie machan Forschung im Bereich künstliche Intelligenz und maschinelles Lernen.
De Anfragn vo de Nutzer wern net gspeichert außer ma vawendet irgnd an Firmennama oder Adressn oder suacht wos zu ana spezielln email-Adress.
Auf den PC vom Nutzer homs koan Zugriff – soweit so guat.

Wos konn i etz do damit macha? Und wos nutzt mia des Ganze?

I hob etz an kostnlosn account bei Chat GPT aufgmacht, weil des mog i etz scho genau wissn,
es geht um menschliche Sprachkommunikation (geht a´schriftlich) zwischn mia und dem Chat GPT.

Mei erste Frage: Konnst du Bayerisch?
Antwort “Ja, ich verstehe und kann auch auf Bayrisch antworten. Was möchtest du wissen oder sagen?”
do war i etz erst amoi so überrascht dass ma glei gar nix eigfoin is.

Frage: Wos konn ma aufm Reitberg ois essen?
Antwort: “Grillwürste und Salate, im Herbst veranstalten sie oft ein Oktoberfest. Im Winter gibt es Glühwein und heiße Schokolade zum Aufwärmen.”
des hob i ja no gar net gwußt… –
des mit dem Boarischn is woi no net recht ausg’reift!

nächste Frage: Kannst du deutsch?
A.: Ja, ich spreche Deutsch. Wie kann ich dir helfen?

Frage: ich habe Muscheln, Zwiebeln, Tomaten und Petersilie im Kühlschrank. Ich möchte gerne ein Rezept mit diesen und weiteren Zutaten
Antwort:

des is etz a gscheite Antwort

Frage: Schreib mir bitte 5 lustige Anekdoten auf
A.: Gerne, ….
Der Einbrecher, der das Falsche gestohlen hat:
Ein Einbrecher brach in ein Haus ein und stahl eine Kiste mit einer seltsamen Substanz darin. Er dachte, es wäre Drogen, aber es stellte sich heraus, dass es Asche von einer verstorbenen Katze war. Der Einbrecher wurde später von der Polizei verhaftet, als er versuchte, die Drogen (Asche) zu verkaufen.
– de andern vier Gschichtn warn a` nett

Frage: Ich möchte gerne eine Liste mit den 30 wichtigsten französischen Verben
A.:

Bis iatz gfoit ma des ganz guat, auf jedn Foi bessa ois wia wenn i mit Google wos suach und dafia wochnlang de gleichn Werbungen kriag.

no a Vasuch:
Frage: Ich möchte gerne eine zusätzliche Steckdose in die Wand einbauen, wie kann ich das machen?
A.:

Frage:

Sauba,
inzwischn konn i vasteh, dass de im erstn Monat scho 100 Mio Nutzer g’habt hom.

Mia g’foits a´guat, solang ma net an Haufn Werbung um de Ohrn fliagt.
De Schüler wern a´ begeistert sei, de Lehra wahrscheinle e´a weniga.
Des Wichtigste is, dass ma klare und freindliche Fragn stellt, dann san de Antwortn scho ganz brauchbar
und dass er net richtig Boarisch konn, des findt i a´ nützlich – der Kastn muass net ois kenna

iatzamoi hob i auf youtube a Folge von de Schlümpfe ogschaugt

und do is ma aufgfoin dass de ja a´ scho Rentner san – de san genauso oid wia i – o.k. sie hom se a bisl bessa g’hoitn wia i aber sie hausn ja a´ in da Natur, des is scho gsünda ois wia in zig Städte…

De Amerikaner behauptn ja dass sie de Schlümpfe erfundtn hom – des dat eana so bassn –
scho aloa de Tatsache dass` blau san sogt uns – sie kenna gar net vo de Amerikaner sei, bei dene is ois schwarz oda weiss.
Und Kinäsn kennans a´ net sei, do wàrns geib.

A belgischer Zeichner und Autor Peyo hot 1958e in seim Kinderbuach “Johann und Pfiffikus” ois Beiwerk sozusong a boar Schlümpfe mitnei zeichnet. Erst Jahre späta hot er a eigne Comic-Serie und Zeichntrickfilme gmacht.

De Leit warn ganz narrisch auf de kloana Wesen. De gibts in olle Länder, in olle Sprachn, mit Figurn und mit eigne Liada.

Schlumpfhausen is a vawunschns Land wo Menschen net nei kenna. De Schlümpfe ernährn se vo Schlumpfbeeren und Gmias und san so a Art Selbstversorger, wia ma heit song dat.

Da Papa Schlumpf hot des Dorf und seine Bewohner im Griff, er is a Alchemist der oiwe wieda an Zaubertrank mixt der olle Gefahren auflöst.

Er is 542 Johr oid und hot rund 100 kloane Schlümpfe ois Nachkommen, wo a jeda andane Qualitätn hot.

Da Schlaubi z.B. woass ganz vui und geht damit olle auf de Nervn.

Da Architekti is a Baumeister und entwirft olle Pilzhäuser

Da Farmi is da Bauernschlumpf, der baut ois o´wos a so braucha

De Schlümpfe lebn in ana fröhlichn Gemeinde wo se a Jeda um den Andern kimmert,
da oanzige Wermutstropfn is da Gagamel und sei Koda, da Azrael

Da Gagamel is eingle koa Schlechter aber er buit se ei, dass er aus de kloana Schlümpfe Gold macha kannt, oiso jogt er de kloana Gestaltn mitsamt seim Koda bei jeda Gelegnheit. Und schmecka datns eam vielleicht a´?
Wenn er dann oa fangt konn an da Papa Schlumpf Gott sei Dank oiwe übalistn und seine Schlumpfkinder wieda ins Dorf zruckbringa.

Mitlerweile gibts 100e Gschichtn und olle san nett und gengan am Schluss guat naus.

Warum is des eingle so, dass de seit 65 Johr auf da ganzn Welt beliebt san?
Koa Ahnung, aber sie san einzigartig, sie san a ganz Dorf, sie hom olle Charaktere die guat san, sie san sozial und sie san guatmütig. Vielleicht is des genau des wos se de normaln Menschn ois Lebnsgemeinschaft wünschn datn.

Oans is allerdings rätslhaft, wo kemman’s eingle her?
Ja guat, a Schlumpfine homs a´, aber de is a` erst guat 100 Johr oid

des konn’s net sei?

Ach so, ja, beim blauen Voimond kummt oiwe moi wieda a Storch vabei und bringt an nein Baby-Schlumpf, an Buam mit. De Mädl zaubert da Papa-Schlumpf seiba her.

Oiso ois wia im richtign Lebn!

Vielleicht schaugt’s eich amoi wieda a Schlumpf-Gschicht o`? I wünsch eich vui Spass

kám dass eng werd erinnern se d’leit wieda an den Herrgott und seine Heifer.

In Südfrankreich hots seit Monatn praktisch net g’rengt, de geringste Regnmenge seit 1959.
D’Regierung hot iatz im Südn Maßnahmen zum Wassersparn vaordnet:
Vabotn is des Bewässern vo Gärtn oder Sportstadien, des Auffülln vo Swimmingpools und as Autowaschn. Des is aba erst de Stufe oans.

De Bödn san komplett dürr, de Bauern und de Winzer san in Panik.
De oanzige Rettung is a Wunder vo Obn, wenns iatz net rengt is ois aus.

In Perpignan (ganz im Südn Richtung Spanien) hom de Winzer an Erzbischof und olle Leit zamtrommet
und hom heit a katholische Prozession am Ufer des Têt obghoitn.
Zur Fürsprache trong 4 Bauern a Reliquienbüste vom Saint-Gauderique auf de Schuitern durchs seichte Wasser
und bittn um Reng.

Da Erzbischof vo da Kathedrale vo Perpignan hot erklärt dass des Ritual scho 150 Johr nimma praktiziert worn is.
Der Saint-Gauderique (Galderic auf katalanisch) war a Bauer, der im 9. Jh. glebt hot und is oana da berühmtestn katalanischn Heiligen der friara bei Wasserprobleme o’gruafn worn is.

Des zoagt dass se de Winzer und de Bauern etz an ois klammern wos no möglich is.
I wünsch eana dass da Heilige net sauer is weils’n so lang net kennt hom und iatz auf amoi soid’a ois “rausreissn”.
De Heilign brauchan a´a Pflege und Zuawendung.