i bin amoi g’spannt,

wia de Leit etz na draufsan.

In da letztn Woch host fast jedn Dog von am möglichn Covid-19 Impfstoff g’lesn.
Boh, des is super, hoffntlich is de schlechte Zeit boid vabei…

Wenn des boid kimmt, brauch ma ja etz nimmer so vui aufbassn –
und genau des stimmt net!!

Es wern etz scho einige Leit a so denga, des bedeit aber fia Olle de wo g’sund aus dera Pandemie rauskemma woin,
bassts mindestns genauso vui auf wia bisher, eher mehra…

Leit seid’s g’scheit und hoit’s mit de Vorsichtsmaßnahmen bis zur Impfung durch!

intressante Sachan rund um Corona

Ja, net so oafach is’, de Situation
– vui Kranke und oiwe mehra Dode
– sogar de Schwedn homs etz g’spannt!

des schaugt bei uns nóch wenig aus – aber g’fährlich is des trotzdem – i mächat net de Oanzige Dode im Landkreis sei, á wenn i a Oanzlfall wár,

mia san do etz mittndrin in da Zwoatn Welle – a ähnlicha Valauf wia 1918 und 1957e – des is a Vagleich mit GB 2020

Wos wirkle anders is, mia wissn net wos bassiert wenn ma nóch Corona (fast) wieda g’sund san.
Wos bleibt uns do vielleicht fia länger?

De Angriffe auf unsern Körper san ganz unterschiedlich.
A oide Tante vo mir hot se letzte Woch Corona G’fanga, sie is 84e und hot absolut koane Symptome – nix!
Sie is zum Dokter g’fahrn worn weil oana vo de Enkl krank is, sunst hätt sie’s gar net g’merkt.
Iatz is’ fia zwoa Wocha dahoam in Quarantäne – is ja net so schlimm, sie hot g’sogt sie wui iatz sowieso auf koa Party net.

De Leit wo sowieso ASS nemma miassn san anscheinend bessa g’schützt.
Laut Ärztezeitung gibt’s do weniger schware Verläufe.

Des betrifft aber bloss de, de des sowieso scho länger vaschrie’m kriang.
Ohne Arzt des selber nemma is aber g’fährlich, deat’s des liaba net, as Bluat werd damit vadünnt, des hoaßt wenn wos bassiert konn ma de Blutung net so oafach stilln.

Es gibt aber á a boor guade kloane Sachan
mia sparn uns z.B. an Haufn Geld,
mia war’n net im Sommerurlaub, mia fahrn á net in Skiurlaub noch Ischgl
und außerdem arbatn vui Leit vo dahoam aus – des spart Kraft, Zeit und Benzin –

i hob bei da Vasicherung og’ruafa und woit dass de mei Fahrleistung auf 1000km im Johr reduziern weil i sowieso dahoam bin – dera “Dame vom Amt” hot des furchtbar leid do, aber weniger wia 5000km homs net im Angebot – des kost me iatz fast so vui wia vorher mit 9000km pro Jahr – super!

Na ja, dafia spar i ma wos bei de Schönheitsmittelchen

– de Firma L’Oreal hot se bei da Regierung beschwert weil ma durch de Maskn dene eanan deiern Lippnstift gar net seng konn und dass iatz überhaupts de Umsätze von de Schönheitsmittl ei’brocha san…
de soin se net so hom, wenn’s a g’scheits Produkt wàr, dann dat ma’s á durch de Maskn daahna, oder?

Fia d’Natur is so a lockdown á net schlecht
de Istanbuler hom normalerweis a ganz a schlechte Luft
aber iatz seng de richtig weit

Fia Viecher kánnt á sei dass guat is,

de Vegl und andre Viecha hom mehra Rua zum Briatn,
de Landschaft erhoit se – außer im Degernseer Doi, do san mehra “Sommerfrischler” ois wia sunst,

a Problem san de net-heimischn Artn – de vamehrn se nämlich á…

schwierig is á dass anscheinend Fledermeis umbrocht wern, weil Oa glam, dass de des Corona übertrong kànntn
und in Italien wern wieda mehre Zugvegl umbrocht – weil etz hom ja Olle mehra Zeit

Es is oiso wia immer – guat und schlecht san eng beinand…

des is etz moi a echte Freid…

der Trump hot valorn – etz kriang ma mitn Biden hoffntlich amoi wieda an andern Ton in da Politik

i hob eich a boor Buidln nei,

es is einfach schee zum seng wia se vui Amerikaner gfrein…

es is immer no a echter Kampf um a korrekts Ergebis,
de Leit in de Abstimmungslokale zähln und zähln nommoi usw.
– in jedm Lokal werd überwacht dass do net g’schummlt werd,
und draußn?
Ja, draußn stengan de Anhänger vom Trump und tobbn und schrein und drommén mit de Feist an de Schei’m,
des is á net lustig fia de do drin…

ma hot fast den Eindruck es is á a Form vom Kampf “Schwarz gega Weiss”

BITTE helfts mit …

Seit a boor Dog is de kloane Katz bei uns in da Gegnd,
de is schwarz mit am weißn Fleck auf der Brust,
sie is ganz jung, gepflegt und sehr zutraulich,
I denk sie is amoi irgendwo mitg’fahrn ohne dass’ Oana g’merkt hot und jetzt findt’s nimma Hoam

Sie treibt se in Waakirchen, Ötzweg rum
BITTE helft’s mit, schickt’s des Buidl an Freunde und Bekannte – hoffentlich kennt’s Oana und woass wo’s hig’härt
Es werd jetzt na ziemlich koid
– unsa Koda wui ned, dass de Katz bei uns eiziagt…

“Heldinnen” – gibt’s sowos eingle nó?

de Oanzige wo mia do spontan ei’foit is de Jeanne D’Arc aus Frankreich im 15. Jh. – oder war do no wos?
Natierlich hot’s überragende Wissenschaftlerinnen, Politikrinnen oder Künstlerinnen gebn – aber wia werd ma eingle a Heldin?

Auf des Thema bin i kemma, weil i mir oiwe wieda o’schaug, wia’s in Belarus (Weissrußland) weidageht –

Do hom de Leit 1994e an Präsidentn Lukaschenko g’wählt, der Eana ois mägliche vasprocha hot – so wia hoit übaroi…
naa, net ganz –
der Lukaschenko hot danoch glei de Kontrolle vom Fernsehn übernomma,
1996e hot er des Parlament und des Verfassungsg’richt aufg’löst und
hot se damit selber des Recht gebn, G’setzer zu erlossn.

D’Opposition hot er seitdem noch oida Sowjet-manier unterdruckt.

Ja, und genau um des geht’s – de Opposition wui einfach dass de Ungerechtigkeitn und de Korruption im Land aufhärt.

Sie hom auf de Wahln im Aug. 2020 g’hofft – und wos war?
Da Lukaschenko hot vakündet dass er mit 80% wiedag’wählt worn is.

So, und jetzt san de Leit auf’d Strass ganga – z’erst in da Hauptstodt Minsk und mitlaweile in jeda großn Stodt – seit Wochn!

Wos is etz do anders?

Z.B. de Art, wia de Proteste oblaffan

– de leit demonstriern unta da oidn Belarus-Flaggn, weiss-rot-weiss (des is eingle vabotn)

Warum de Fahna?
De Opposition wui net den Anschein erwecka, sie hängan se z.B. an de EU ó – sie demonstriern fia de eigne Demokratie!

– de Leit demonstriern friedlich

— im Gegnsatz zu de Schergn vom Lukaschenko

de kemman vamummt und trei’m de wehrlosn Frau’n in de Eckn z’am

– des san ordntliche Demonstrantn,

hä – wos soi etz des sei?

Sie benehma se rücksichtsvoll, san ordntlich, rama noch da Demo auf und bringa eanan Müll weg.
Sie ziang sogar eanane Schua aus, wenn’s auf a Parkbank zum Demonstriern nauf steing.
Ja, sowos hob i á no nia g’härt!
Sie helfn se á gegnseitig wenn Oana valetzt werd und vateiln Essen aus Spendn.

– es demonstriern vui Frau’n

Wia etz des?
Tja, da Lukaschenko vasuacht ja scho lang de Opposition zum Schweing z’bringa –
er hot z.B. an Oppositionelln vor der Wahl ei’sperrn lossn –
und damit er selber net ois Kleingeist do’steht, hot a dem sei Frau “Swetlana Tichanowskaja” ois Gegnkandidatin zualossn – a richtiga Fehla…
er hot iatz wahrscheinle Albträume deswegn – sie is heit a stärkere Gegnerin ois ihra Mo des je wer’n hät kenna!

De Frau’n hom jetzt glei drei starke Frau’n an da Spitzn,
oane is de “Maria Kolesnikowa”
und genau de hot me wirkle beeindruckt:

Da Lukaschenko hot de Politikerin an da Grenz zur Ukraine festnemma lossn – angeblich woit’s obhaun! Dawei hot er’s selber do hi’karrn lossn – es hätt so ausschaung soin, ois hätt sie Belarus varot’n – so a Sch…
wos hot etz de Maria Kolesnikowa dó?

Sie hot direkt an da Grenz ihr’n Pass z’rissn und is z’fuass z’ruck noch Minsk g’laffa.
In Belarus is’ etz a Heldin – Olle san stoiz auf sie!

I dat ma wünschn, dass de Opposition Erfoig hot – de woin anscheinend wirkle a Demokratie sei
und vielleicht hom’s á de Schrift’n vom Mahatma Gandi g’lesn – der hot’s á mit jahrelangm gewaltfreiem Widerstand g’schafft, dass Indien ab 1947 unabhängig worn is – warum net a in Belarus?

Des hätt i jetzt fast vagessn – der Lukaschenko losst ja á koa Blamásch net aus:

De oide Fahna vo Belarus hot er ja vabotn
– wos hom d’Leit do? Sie hom eanane Nationalfarbn weiss-rot-weiss trotzdem aufg’hängt…

– Wos hot etz da Lukaschenko erbost do?
Er hot de Feierwehr mit lange Loatern g’schickt, dass’ de vabotna Farbn do beseitign…

de 2te Welle übersteh ma á no!

De 2te Corona-Welle lafft,
de Urlauber san z’ruck, de Zahln gengan nauf, aber – de Todesfälle bei uns bleim niedrig – bei Andre á

Warum is des so?

Da Hauptgrund werd woi sei, dass de Meistn vorsichtig san und de Infektionszahln damit langsamer steing.
Á de Vorbereitungen im Gesundheitswesn san besser und es is mehra getestet worn – de Infiziertn san á schneller in Quarantäne kemma. Außerdem kumman etz de Hausärzte und de Patientn besser mit dera Situation z’recht – a Jeda woaß etz worum’s geht!

Bei manche Länder schaugt des ois net so guat aus, de 2te Welle is zwar vabei aber de Todeszahln san hoch

Weltweit g’seng steing de Zahln immer no stark ó

In USA extreme Zahln,
á in Israel – do kummt wahrscheinle a neier Lockdown,
in Frankreich hom’s de hächstn Zahln seit’m Anfang vo dera Pandemie und
in Spanien á hohe Zahln und große Einschränkungen überoi

Oiso,
Leit bassd’s auf Eich auf und bleibt’s g’sund – de Zeit geht á vabei!

… reif fia de Insel?

aba bass auf, dass’d net dasauf’st!


(Bundeszentrale für politische Bildung)

Im Juni 1831 fangt rd. 50km vor Sizilien as Meer ó zum Kocha – tagelang Rách, Dreck und gliáde Brockan…
Im August 1831 nachad war de Insl fertig – 5km lang und 63 Meter hoch – unglaublich!

Und wos bassiert etz, wenn plötzlich a neie Insl aufdaucht?

Richtig! – de Streiterei, wem’s g’härt geht sofort los!
De Anreiner-Staatn hom á glei Nama vagebn – da Deitsche Vulkanologe hot g’sogt de Insl hoaßt Ferdinandea, wia da Sizilianische König Ferdinand.
De Engländer hom g’sogt, de hoaßt Graham und
de Franzosn hom’s Giulia g’hoaßn…
Der Zwist is soweit ganga, dass de damalige Presse scho an Kriag kemma g’seng hot…

An Herrgott hot’s etz g’langt, er hot de Insl o’gschrian
“Insl, etz dua wos, sunst kimm i owe!”
Auweh, hot se d’Insl denkt, oiso guat, dann verschwindt i hoit wieda.

Do hom’s bläd g’schaugt, de Erdnbewohner – a hoib’s Johr späta war de Insl nimmer do!

De Insl is etz 8 Meter unter da Oberfläche und a Problem fia de Schifffahrt –
des hom’s etz davo – Recht g’schicht Eana!

Ma kannt moana etz is a Rua – aba nà, des werd no besser…

1987, in da Zeit wo de Amerikaner sauer war’n auf den Gaddafi san de Amerikaner mit a boor Kampfjets über Italien Richtung Lybien g’flong und hom bei Sizilien Rách aufsteing seng –
Schit – der Gaddafi hot do a UBoot vor Italien – ebba a Submarine Raketenabschussrampn??
Sie hom net lang g’facklt und hom des “UBoot” bombadiert –
tja – etz war de Insl erst recht sauer, de Presse hot an Maulkorb kriagt, aber der Rest vo da Welt hot g’lacht – de Amerikaner war’n scho oiwei ganz toll…

An’am italienischn Arzt, dem Domenico Macaluso, is des 2002 dann olles z’bläd worn und er hot se denkt, wos gla’m denn de Deppn olle, i schraub etz do a Dófe hi – na is endlich a Ruah!

Auf dera Dófe steht “Dieses Stück Land, einst Ferdinandea genannt, gehörte dem Volk Siziliens und wird ihm immer gehören” – ois klar?!

Komischerweise war de Dófe kurz drauf in Trümmer zerschlong, da Macaluso is oiwe no narrisch und verdächtigt seitdem “fremde Mächte”, Anderne son’g, des war a Anker von an Schiff oder so –

I hoff ja, dass de Insl ihr’n Humor b’hoit und irgendwann wieda auftaucht, und i schreib nachad an Teil Zwoa vo dera G’schicht – do g’frei i mi etz scho drauf…