Ostern mit Familie und Kinder is lustig und nett,
Ostern ohne Familie – de Karin und Enkel san Olle im Urlaub – is schod aba aa nett
Ostern ohne Mo – der is bei seim Bruada – is dann gmiatlich
hoit, da Loui unser Koda is ja aa no dahoam…
s’Weda is wunderbar, d’Sonna scheint, i sitz auf da Terassn
a Buach in da Hand a KaffeeTass danebn und da Koda is unterwegs – ich liebe es!
Damit da Loui einfach raus und rei konn loss i imma an Spoit von da Schiebetür im Wohnzimmer offn, sunst muass i dauernd aufsteh usw.
Wia i so vor mi hi dram kimmt da Loui ums Eck und hot stoiz an Baby-Salamander im Maul und rennt schnurstracks Richtung offne Tür,
i schrei “Nein Loui” er rennt weida, i start los und schiab de Tür zua,
da Loui daschrickt und losst den Salamander foin und der is flott und rennt durch den letztn Spoit ins Wohnzimma nei – super!
Da Loui suacht sein Salamander und i reiss de Tür wieda auf – sch… wo is etz der? Mist Mist Mist, i siegn net…
da Loui hot mi im Verdacht und schreit auf mi ei,
i suach den Salamander – puh, do is er, er hängt am Türstock und schaugt uns zua – i glabs ja net,
i drah me um, do liegt a Arbeitshandschua (der Unordnung vom Georg sei Dank)
i nimm den und ziag a buidsaubane Rückhand durch (Tischtennis), da Salamander fliagt im hohen Bogn üba de Terassn ins Gros nei.
Da Loui hots net gseng und moant i hob vielleicht sein Salamander vaspeist – des is ja des Letzte! – er scheisst me richtig zam und rennt dann beleidigt naus Richtung Feld.
Pff, a so a Osternachmittog is doch wos richtig gmiatlichs oda?
