des Grob vom Benedikt is fertig

des Grob von
Benedictus PP XVI
is hergricht und konn seit gestern im Petersdom besichtigt wern

de Inschrift is in Latein
Papa Benedict der 16.
aus dem lateinischn Wort Papa is des Wort Vater abgeleitet worn

Er möge in Frieden ruhen
und i wünsch ma, dass ma se net nur an seine Fehler sondern vor allem an seine positivn Veränderungen erinnert

Papst Benedikt is beigsetzt

5.01.2022
Papst Benedikt XVI. is beigsetzt

er is in am Zypressensarg

Warum etz a Zypresse?
De Zypresse is symbolisch mit da Hoffnung auf Auferstehung und da Verbindung vo Erde und Himme verbundn.

Er seiber is mitnand mit a na vasiegltn Schriftrolle mit seim Werdegang in Latein, des Rogito (Urkundn zu seine Rechtstitel) und der Papsturkunde in dem Sarg drin.
Normalerweis is a´ da Baldachin mit drin – Zeichen der Papstwürde – des Gsicht vom Papst Benedikt is aber mit am weißn Tuach bedeckt worn, vamutlich weil er ja net im Amt gstorm is.

Außerdem is sei mit am Hammer zerbrochner Fischerring und sei Sigel im Sarg mit drin.

Wenn a Papst in Amt und Würdn stirbt kumman a´no Münzn in sein Sarg mit nei. Obs des jetzt beim Papst Benedikt gmacht hom woass i net, aber richtig wa`rs.

Goldene für de Jahre, suibane fia de Monate und kupfane fia de Tage seina Amtszeit. Oftmois warns Münzn de während seina Amtszeit geprägt worn san.
Oiso bei eam 7 Goldmünzn


(nur a Beispui)

10 Silbermünzn


(nur a Beispui)

und 9 Kupfermünzn.

Der Zypressnsarg is dann in an Zinksarg neikumma und rundrum valötet worn damit der Corpus möglichst lang erhoitn bleibt.
Der Zinksarg is wichtig weil sei Grabstelle ja fia de Öffntlichkeit zugänglich is und vui Besucher ja zum Oana vui Luft aus- und eiatmen und zum Andern jeda Mensch ja a´Bakterien um sich rum hot.

Danoch is der wiederum in an Ulmensarg mit Papstwappn und Schuidl neikumma.
Ulme war friara in Mittelitalien und Rom sehr knapp, wer in Ulme begro’m worn is war oiso a Person mit hoher Position, Würde und Reichtum.

Der letzte Deckel is dann endgültig mit Goldnägl versieglt

und in de Grabstelle in da Krypta oweglossn worn

dann is er zum letztn moi gsegnet worn
des Grob zuagmacht, vasieglt und mit ana Grobplattn kennzeichnet worn.

In a boa Dog konn ma na des fertige Grob in da Krypta besichtign


Des war der Papst Benedikt am Grob von seim Vorgänger Papst Paul II.

da oanzige Boarische Papst is nimma

am 31.12.2022 is unsa Boarischa Papst Benedikt gstorm – Papa emerito Benedetto XVI, wia’n de Italiener ghoassn hom

Er war oana vo dene de wo mei ganz Lebn im Hintagrund irgndwia imma do warn.
I woass, mit 95e konn ma scho a´ amoi sterbn, aba es gfoit ma trotzdem net.

De Familie Ratzinger

Mama, Maria Ratzinger, geb. Peintner
Papa, Joseph Ratzinger
3 Kinder
Maria Theogona Ratzinger, 1921 – 1991
Georg Ratzinger, 1924 – 2020 und
da kloane Joseph Aloysius Ratzinger, 1927 – 2022

Schnei homs in da Schui gsogt, dass da kloane Ratzinger a gscheida Bua is
und im Studium hot se dann bewahrheitet dass er a hochintelligenta Denker is.

1951 hot er mitnand mit seim Bruada Georg de Priesterweihe obgschlossn

danoch hot er sein Dr-Titel gmacht und
ab 1955 war er Theologischer Professor fia Fundamentaltheologien

im Lauf da nächstn Jahrzehnte hot er no mehrere Lehrstühle inneghabt

sei Schwester, die Maria war immer an seiner Seitn, in jeda Stodt wo er gwohnt hot, hom de zwoa an gemeinsama Haushoit ghabt.

Sie hot se um de weltlichn Dinge kimmert und er um de geistign.
Nembei hots eam a seine ganzn Redn dahoam auf ana Schreibmaschin tippt.
Wo’s dann länga in Rom warn, hot de Maria sogar Italienisch glernt, wei ma muass se doch mit de Leit untahoitn kenna

1977 is da Joseph dann Erzbischof vo Münchn und Freising worn

und 1981 dann Kardinal

Da Bruada Georg und de Schwester Maria warn sei Stütze

De Maria hot se um ois drumrum kümmert,
wias vom Friedhof vom Grob da Eltern hoamganga is hots an Herzinfarkt kriagt und is quasi no im Pfarrhof gstorm.
Des war 1991 a herber Schlog fia de Briada.
Bei Ihrana Beerdigung soi da Kardinal Ratzinger furchtbar gwoant hom (hot de damalige Zuagehfrau gsogt…).

Ab Januar 1982 is da Kardinal Ratzinger dann ois Präfekt der vatikanischn Glaubenskongregation noch Rom ganga. Er hot dann 23 Johr lang de Katholische Kirch massgeblich mitgestaltet.

Mehrmois im Johr war er a´ in Bayern bei Veranstaltungen oder auf Bsuach bei seim Bruada Georg.

Ois dann am 2.04.2005 Papst Johannes Paul II. noch 26 Johr ois Kirchenoberhaupt gstorm is,

is da Boarische Prof. Prof. Dr. Josef Ratzinger Papst Benedikt XVI. worn
wenn ma sei Entwicklung oschaugt eingle a logische Folge
aber er woit gar net Papst wern, er hot genau gwusst welchane Probleme do im Hintergrund schlummern,
er hot gsogt “das Fallbeil is niedergsaust”
aber er hot se in den göttlichen Auftrog gfügt

Noch zahlreiche Auslandsreisn is a bisl ruhiga worn,
er hot wieda Zeit ghabt zum Nochdenga.
Er woit eingle de Katholische Kirch von innen raus erneuern, zruck zum wahren Glauben, zur Liebe zu Gott.

A unmöglichs Unterfangen fia an oidn Papst.
Und des Schlimmste, de Misbrauchsskandale san endlich öffentlich worn. Er war zwar koa Täter, aber er hot davo gwußt, – schlimm gnua -.
Aber er hot immerhin gega an immensn Wiederstand rd. 150 Kirchnvatreta entlassn – wenigstns ebbas…

Wia er dann gmerkt hot, dass er de Kirch ois oida Papst nimma erneuern konn, hot er den schwierigstn Schritt in seina Karriere unternomma – er hot am 11.02.2013 auf sei Amt ois Nachfolger Petri auf Erdn vazicht.
Sei ganz’ Lebn hot er draufhi g’arbat dass er de Weltkirche vabessern konn und hot dann ohne über seine Nachteile nochz’denga einfach vazicht.
Des hots in dera Art no nia gebn.

Des war a unglaublich mutiger Schritt!

Er hot auf Ois vazicht und hot Glück ghabt dass eam sei Nachfolger sei Rua lossn hot und eam sei persönlicha Sekretär, da Georg Gänswein, weida de Treue g’hoitn hot

– bis zum Schluss

Vui Leit san noch Rom gflong und woin eam de letzte Ehre erweisn

Am Donnersdog werd er in da Krypta im Petersdom beigsetzt

Heilig Abend in Buffalo USA

Da Hl. Omnd in de Staatn is fia de Meistn richtig grauslich g’wen

In Buffalo z.B. hot’s nur no Schnee und Eiswind gebn

es is so vui Schnee dass sogar d’Feierwehr nimma durchkemma is

De Stromnetze san beschädigt oder komplett übalastet

im Erie County san alloa über a hoibe Million Leit ohne Strom


meterhohe Schneewehen auf da Strass

de Rettungsdienste mian se ob, vui gebn auf

mit olle meglichn Gerätschaftn und riesige Bagger vasuachans festg’steckte LKWs ausm Schnee z’ziang

mit kloane Fräsn hom d’Leit vasuacht dem Schnee a bisl Herr z’wern

aber do is koa durchkemma

desmoi is’ wirklich schlimm kemma, hoff ma dass se d’Leit irgndwia warmhoitn kenna

de SchneeFrau zumindest fuit se aba pudlwoi

etz is er do der gewaltige Blizzard

und as Chaos auf da Strass a´

Oa Unfoi, do is’ a LKW, und 1000e stengan,
aba sie derfn sowieso nimma weida fahrn

Im Erie County guit seit heit Mittog a generelles Fahrverbot, Ausnahme Notfahrten.

Wos dean etz do dejenign de in da Arbat san, wia kemman de wieda hoam 1 Dog vor Weihnachtn??

Wos machan de Fahrer vo Amazon oda FedEx …

Hoffntlich is de Polizei so vanünftig und losst de Olle net bei eisige Tempraturn auf da Strass steh

s’Hochwasser breit se a´aus

des is de Ubahn/Bahnstation in Hoboken NY – normalerweis,

und a so schaugt’s heit aus:

und des is etz erst da Anfang

d’Amis hom a´ net vui Spass mitm Weda

Etz homs de Sturmsaison hinta sich, und scho geht’s wieda weida

iatz kummt a sog. “Zyklonbombe”, sowos passiert angeblich bloss oamoi pro Generation

– ganz krass, innerhoib von 7 Stundn sinkt de Tempratur um 33°F (-36°C) – des is ja no heftiga wia bei uns,
mitnand mit am heftign Druckobfoi bildet se do in de nächstn 24 Std. a extrem koida Zyklon mit fui Schnee

De arktische Front bringt de nächstn 4 Dog a g’fährliche Kältn, sehr starke Schneeböen und Blitzeis üba Zentral-USA bis in Ostn

Warum is etz des no vui schlimma wia sunst?
Mia hom Weihnachtn
und vui Amerikaner, 112 Millionen Amerikaner, san zwischn dem 23.12. und dem 2.Jan. untawegs,
vui fliang und de Andern fahrn mitm Auto.

Beides koa guade Idee,
in Oklahoma is heit scho Chaos, auf de Autobahnen san üba 100 Autos und LKW steckabliebn – und des bei dene eisign Tempraturen -,
in da Nähe vo kloane und mittlare Orte wern Wärmestationen eig’richt, do muass ma aba a´ erst amoi hikemma,

an de Flughäfn san iatz scho 1000e Flüge gstricha worn – und des ois 2 Dog vor Weihnachtn!

Wünsch ma de Amerikana dass net so schlimm werd wia’s da Wetterbericht sogt

Umrechnung Fahrenheit zu Celsius mit Google:

wos macht de Energiewende mit da Birne?

der junge Aktivist “stoppt Öl” hot se noch da Pause vom Fuassboi-Spui Everton gega Newcastle in England,
mit an Kabelbinder an àn Torpfostn hibundn.
Er woit damit bezweckn dass olle Zuschauer drüber nochdenga wia schlecht des Öl fia Olle is.

i woass etz net ob de Zuschauer net eher wos Anders denkt hom,
wos steit eingle de Energiewende mit da Birne vo so an Aktivistn ó? – Des soit ma moi untasuacha.

Wo’s eam nacha mit da Schaar an’ Krong ganga san, war à nimma so lässig drauf

Vielleicht soitn se Olle liaba moi üerleng wia de Realitätn san?
Wegam Öl und Gas is da Habeck etzt grod in da ganzn Welt ois Bittsteller unterwegs –

Wia is des aba beim Strom?

Grod de Junga hom olle dauernd as Händi in da Hand oda hengan am Fernseher oda Computer – des vabraucht vui Strom.

Wia schaugtn des eingle in Deitschland mitm Stromvabrauch aus?

Mia brauchan oiso bis 2030e mindestns 665 Milliarden kilowatt-Stunden Strom pro Johr!
De Zahl muass ma se moi neiziang

Und wia soi ma des mit erneuerbare Energiequellen macha?

da Bedarf is do noch Tagen aufgschlüsslt,
de lila Linie is da Bedarf und de amdern farbign Bereiche san de vaschiednen alternativn Energien de Deitschland zur Vafügung hot.

Wos ma klar sigt is, dass da Bedarf an koam Dog gedeckt is.

Wia geht’s etz do na weida?
Den Strom reduziern wui koana – de Junga scho gor net,
oiso miass ma den kaffa – deia kaffa – so oder so.

Des Billigste wár Kernenergie, Japan und China baun grod an haufn neie Kernreaktoren.
Bei uns werd Heia ois obgschoitn.
Mia kaffan unsan Strom künftig in Frankreich.
Damit de Franzosn des ois herbringan, baun’s neie Reaktoren an da Deitschn Grenz,

des lafft doch super,
do kenn’ ma doch iatz a guat’s Gwissn hom, oda?

bohh – äää!

aufm Mars is á net schlecht…

und Hotels gibt’s do – bohh-äää!

ja, kunnt ma moana,
es schaugt tatsächle so aus is aba einfach bloss Bsuach aus da Sahara
im Frühjohr und im Sommer gibt’s des hin und wieda

links von Spanien von obn noch untn hi hom ma grod a Tiefdruckgebiet,
des schaufet koide Luft noch Nordafrika
und vatreibt do de hoasse Luft in Richtung Nordn

de hoasse Luft werd reglrecht noch obn hi o’gsaugt

Portugal, Spanien, Frankreich und Bayern hot’s bis iatz am meistn dawischt

der hoasse Sand vadunklt de Sonna und ois schaugt aus wia hinta am Filter

in Minga hots gestern so ausgschaugt

in Konstanz a soo

bei mir heraus a so

und beim Skifahrn schaugt’s á guad aus

obndrüber host den Dreck und drunter den blütenreinen weißn Schnää

und am Donnersdog kannts nommoi richtig dick daherkemma

schaung ma moi

wenn se Jemand genauer intressiert – vielleicht fia an Aufsatz in da Schui – schreibts me ó, i schick eich dann de Adressn fia a bor guade webseitn

Atomwaffen – konn er de wirkle zündn?

wia is des eingle mitm Zünden vo Atomwaffen?
Konn da Putin wenn er no mehra spinnt, so einfach an Knopf drucka?

NAA, so einfach is net!

Da Lars Winkelsdorf is Journalist und Fachdozent fia Waffenkunde und er erklärt des so:

De Kommandogewalt in Rußland is net alloa beim Putin, sondern verteilt se auf mehrane Personen.

Da Putin hot an Atomkoffa, den “Cheget” (da US-Präsident hot á oan, den “Football”).
Da Koffa is wia a gross Telefon mit mehrare Biacha mit Erklärungen und etliche Code-Kartn.
Üba des Telefon werd da Einsatzbefehl codiert und mit dem spezielln Kommunikationssystem “Kavkaz” obgschickt.
Des is dann de 1. Häifte des Codes.

Der codierte Befehl kummt danoch beim Russischn Verteidigungsminister ó.
Der hot á an soichan Koffer und codiert etz de 2. Häifte des Codes und schickt den dann üba “Kavcaz” an den Generalstab.

Der Generalstab hot an einga komplettn Code – erst mit dem mitnand is a Freigabe überhaupt möglich.

Jetzt erst konn a echta Angriffsbefehl vom Generalstab an de Kernwaffneinheitn gem wern.
Danoch muass de Kernwaffe erst amoi scharf gmacht wern – des geht á nur mit olle Codes.
Wenn des funktioniert hot, konn da Raketnstart ausglöst wern.

Dass de Explosion überhaupt funktioniert muass a absolut Synchrone Zündung vo de Sprengstofflinsn erfoing.
De Zündung bassiert über a Art Computer, wenn des net 1000%ig exakt is, dann gibts koa Explosion – dann vateilt se des radioaktive Material einfach in da Gegnd.

Da Atom-Sprengkopf alloa nützt oiso ohne de Codes und de synchrone Zündung absolut nix!

De Atomwaffn vo de Russn san oid und Atomwaffn kennan quasi net gewartet wern – ma miassad immer komplett neie Systeme baun und des hom de Russn vamutlich net gmacht.

Oiso hoff ma moi dass de Dinga só gar nimma funktioniern –
Naa, mia hoffn einfach, dass oana vo de Beteiligtn Personen vanünftig is und sowos wirkle net wui!