wos macht de Energiewende mit da Birne?

der junge Aktivist “stoppt Öl” hot se noch da Pause vom Fuassboi-Spui Everton gega Newcastle in England,
mit an Kabelbinder an àn Torpfostn hibundn.
Er woit damit bezweckn dass olle Zuschauer drüber nochdenga wia schlecht des Öl fia Olle is.

i woass etz net ob de Zuschauer net eher wos Anders denkt hom,
wos steit eingle de Energiewende mit da Birne vo so an Aktivistn ó? – Des soit ma moi untasuacha.

Wo’s eam nacha mit da Schaar an’ Krong ganga san, war à nimma so lässig drauf

Vielleicht soitn se Olle liaba moi üerleng wia de Realitätn san?
Wegam Öl und Gas is da Habeck etzt grod in da ganzn Welt ois Bittsteller unterwegs –

Wia is des aba beim Strom?

Grod de Junga hom olle dauernd as Händi in da Hand oda hengan am Fernseher oda Computer – des vabraucht vui Strom.

Wia schaugtn des eingle in Deitschland mitm Stromvabrauch aus?

Mia brauchan oiso bis 2030e mindestns 665 Milliarden kilowatt-Stunden Strom pro Johr!
De Zahl muass ma se moi neiziang

Und wia soi ma des mit erneuerbare Energiequellen macha?

da Bedarf is do noch Tagen aufgschlüsslt,
de lila Linie is da Bedarf und de amdern farbign Bereiche san de vaschiednen alternativn Energien de Deitschland zur Vafügung hot.

Wos ma klar sigt is, dass da Bedarf an koam Dog gedeckt is.

Wia geht’s etz do na weida?
Den Strom reduziern wui koana – de Junga scho gor net,
oiso miass ma den kaffa – deia kaffa – so oder so.

Des Billigste wár Kernenergie, Japan und China baun grod an haufn neie Kernreaktoren.
Bei uns werd Heia ois obgschoitn.
Mia kaffan unsan Strom künftig in Frankreich.
Damit de Franzosn des ois herbringan, baun’s neie Reaktoren an da Deitschn Grenz,

des lafft doch super,
do kenn’ ma doch iatz a guat’s Gwissn hom, oda?

bohh – äää!

aufm Mars is á net schlecht…

und Hotels gibt’s do – bohh-äää!

ja, kunnt ma moana,
es schaugt tatsächle so aus is aba einfach bloss Bsuach aus da Sahara
im Frühjohr und im Sommer gibt’s des hin und wieda

links von Spanien von obn noch untn hi hom ma grod a Tiefdruckgebiet,
des schaufet koide Luft noch Nordafrika
und vatreibt do de hoasse Luft in Richtung Nordn

de hoasse Luft werd reglrecht noch obn hi o’gsaugt

Portugal, Spanien, Frankreich und Bayern hot’s bis iatz am meistn dawischt

der hoasse Sand vadunklt de Sonna und ois schaugt aus wia hinta am Filter

in Minga hots gestern so ausgschaugt

in Konstanz a soo

bei mir heraus a so

und beim Skifahrn schaugt’s á guad aus

obndrüber host den Dreck und drunter den blütenreinen weißn Schnää

und am Donnersdog kannts nommoi richtig dick daherkemma

schaung ma moi

wenn se Jemand genauer intressiert – vielleicht fia an Aufsatz in da Schui – schreibts me ó, i schick eich dann de Adressn fia a bor guade webseitn

Atomwaffen – konn er de wirkle zündn?

wia is des eingle mitm Zünden vo Atomwaffen?
Konn da Putin wenn er no mehra spinnt, so einfach an Knopf drucka?

NAA, so einfach is net!

Da Lars Winkelsdorf is Journalist und Fachdozent fia Waffenkunde und er erklärt des so:

De Kommandogewalt in Rußland is net alloa beim Putin, sondern verteilt se auf mehrane Personen.

Da Putin hot an Atomkoffa, den “Cheget” (da US-Präsident hot á oan, den “Football”).
Da Koffa is wia a gross Telefon mit mehrare Biacha mit Erklärungen und etliche Code-Kartn.
Üba des Telefon werd da Einsatzbefehl codiert und mit dem spezielln Kommunikationssystem “Kavkaz” obgschickt.
Des is dann de 1. Häifte des Codes.

Der codierte Befehl kummt danoch beim Russischn Verteidigungsminister ó.
Der hot á an soichan Koffer und codiert etz de 2. Häifte des Codes und schickt den dann üba “Kavcaz” an den Generalstab.

Der Generalstab hot an einga komplettn Code – erst mit dem mitnand is a Freigabe überhaupt möglich.

Jetzt erst konn a echta Angriffsbefehl vom Generalstab an de Kernwaffneinheitn gem wern.
Danoch muass de Kernwaffe erst amoi scharf gmacht wern – des geht á nur mit olle Codes.
Wenn des funktioniert hot, konn da Raketnstart ausglöst wern.

Dass de Explosion überhaupt funktioniert muass a absolut Synchrone Zündung vo de Sprengstofflinsn erfoing.
De Zündung bassiert über a Art Computer, wenn des net 1000%ig exakt is, dann gibts koa Explosion – dann vateilt se des radioaktive Material einfach in da Gegnd.

Da Atom-Sprengkopf alloa nützt oiso ohne de Codes und de synchrone Zündung absolut nix!

De Atomwaffn vo de Russn san oid und Atomwaffn kennan quasi net gewartet wern – ma miassad immer komplett neie Systeme baun und des hom de Russn vamutlich net gmacht.

Oiso hoff ma moi dass de Dinga só gar nimma funktioniern –
Naa, mia hoffn einfach, dass oana vo de Beteiligtn Personen vanünftig is und sowos wirkle net wui!

jetzt kummt richtig Druck in den Kessel…

De Schweizer Bürger gengan fia’d Ukraine auf’d Straß – des is super!!

Aktuell dischkriert da Bundesrat vo de Schweizer dass’ auf eana Neutralität Richtung Russland vazichtn.
De Russischn Hochrangign ham in d Schweiz a Vermögn vo 20,5 Milliardn Euro.


(Ausdruck aus der FAZ-online von heit)

Wenn des jetzt eigfrorn wern dat, dann kriagat da Putin richtig Druck vo seine Gefolgsleit – de meng des sicha net, dass’ auf eana Geld nimma zuagreifn kenna!

Soo kannt’s geh?!

A` mindestns de Hälfte vo de Russischn Bürger woin den Kriag net und etliche gengan auf’d Strass – vui wern eigsperrt, aber wenn’s no vui mehra wern datn, kanntn ses nimma eisperrn weils einfach z’fui Leit warn.

I hoff einfach drauf, dass da Putin vo seine einga Leit entmachtet werd

des is ja schlimm…

Koa Mensch hätt glabt dass der Putin seit Jahren bloss oans im Kopf g’habt hot – Kriag!
De Krim war der 1. Schritt…

Lt. Putin bedroht des kloane Land Ukraine “Väterchen Russland” – is der im Kopf ausgstieng???
Oder hot er Angst, dass de Leit a Leben ohne Kriag und Angst gfoin kannt?

Mei persönliche Meinung is, dass de EU etz zoang muass dass’ a Staatnverbund is und net bloss lauta oanzelne Staatn de zufällig Nachbarn san.
Gegn den Kriagstreiba Putin miassn olle dem entgegntretn – am Bestn weltweit – es lafft scho o’…

Es wern á Probleme fia uns kemma, aba wenn se a Jeda á a bisl um Andane kümmert, wern ma dene Herr!

I beschäftig me seit üba 20 Johr mit Börsnanalyse –
do stellt se mia natierlich de Frage, wos is im Hinblick auf den Kriag in da Ukraine etz sinnvoll und wos net!?

Des Wichtigste is – koa Panik,
warum net?

Weil bei echte Krisen erst amoi ois runter geht und noch einige Dog wieda rauf.

I zoag eich a Schaubild wia des bei andana Krisn am US-Markt im Dow Jones ausg’schaugt hot (bei echte Krisn laffan fast olle wichtign Märkte gleich):

so kennt’s des lesn:
links de vaschiednen Krisn
nemm’ ma moi ois Beispui den Angriff auf Pearl Harbor 07.12.1941
am 1.Dog is da Markt um 3,8% ei’brocha de Dog drauf is weida oweganga, insgesamt hot da Markt am diafstn Punkt 19,8% valorn, bis se de Lage stabilisiert hot, hots domois 143 Dog dauert, bis ois wieda “beim oidn” war hots insgesamt 307 Dog dauert.

Wia is etz des ganz praktisch in Deitschland?

Mia treim Handl mit Russland, aber so dramatisch wia Vui moana is’ gar net

da Außenhandel (Einfuhr/Ausfuhr) mit Russland macht grod 2,3% aus

Wo kriang ma etz dann Probleme?

De Preise fia Öl und Gas wern kräftig steing (de Tankstelln hom des ois scho vorher g’wußt, da Preis fian Lita is etz bei 1,90e 😣)
de Lieferungen aus Russland san unsicher – und nochdem de russischn Bankn seit heit nimma im SWIFT- Banknsystem san – san de Lieferungen no unsichara,
de Deitsche bzw. EU Politik reagiert scho entsprechnd – es werd so schnei wia möglich a Lagersystem fia Gas und Öl baut…

Am Agrarmarkt gibts a große Unsicherheit,
Russland is Exportland fia große Mengen Ammoniumnitrat, Phosphor und Kali,
des hoaßt dass de Düngerpreise gewaltig steing wern
und dann in da Folge á de Preise fia Getreideerzeugnisse

de Ost-Ukraine exportiert große Mengen Gerste, Sonnenblumen-, Weizen- und Gerstenerzeugnisse,
wenn da Putin de Ost-Ukraine besetzt dann hot des Auswirkungen auf unserne Lebensmittelpreise in vui Bereiche

es gibt a guade Internetseitn fia Agrar:

https://www.agrarheute.com/markt/duengemittel/duengerpreise-neue-preisspirale-ukraine-krise-ausgeloest-590571

Olle tollen russischn Aktien – vui mit hohe Dividenden san owe grauscht und lodn uns zum Kauf ei…??

denkt’s dro dass de zwar “billig” ausschaung,
aber de politischn Risiken san immens

“schlimma geht imma”

schee dass er wieder dahoam is und mitheift

mei Mo war etz 3 Dog bei seim Bruada und is seit gestern wieda do.

Grod vorhin,
a mords Gschrei vom Loui (unsa Koda) im Schlafzimmer,
mia renna nei – a Vogl is an d’Scheim gflong und liegt dod am Bodn vom Balkon – super!
Da Loui wui naus und rennt immer wieder an d’Scheim hi.

Mei Mo, “des gibt etz a mords Sauerrei”.
I sog, “hoitn fest, i geh drüm naus”..

I hob den Vogl gnomma und in an Busch nausgschmissn – do konn se da Koda etz austobn, den findt er net…

I bin wieda ins Schlafzimmer, hob de Dir aufg’macht und da Loui hot gschrian und is um den Fleg wo da Vogl war, rumdanzt.
Zu meim Mo hob i gsogt, “I hobn owe gschmissn in den Busch, nimm’n und trogn owe”…

Mei Mo geht owe mit eam, trogtn zu dem Busch hi und sogt zum Koda “schau da is er doch”,
da Loui macht an Satz und oan Wischer und scho hot er’n.

Mei Mo schaugt rauf und sogt “Du, ich glaub der will rein mit ihm” – ah, geh?!

Lossn ja drauss!!!

Da Loui denkt se, endlich amoi a gscheida Christbaam
und iatz gäht er vo dem Busch mimma weg – vielleicht hängt j no a Vogl do drin?!

Und wer rammt etz den Saustoi weg?

I hob me umsunst aufgregt (dawei war i grod so mittn drin) – mei Mo hot ois sauber gmacht –
I bin doch froh, dass er wieder dahoam is!

a boor Infoseitn zum Vulkan und Klima

fois eich des Thema Vulkan, Klima usw. intressiert,
do san a boor Infoseitn auf dene i mi rumtreib…

beim Benjamin Claussner bin i fast jeden Dog, der macht ganz nette Videos – á vom Lebn drumrum.
Er is a Deitscha und lebt mit seina Familie auf La Palma.
Sei Blog hoasst “Bananeninsel”, den Nama auf youtube eigebn:

dann is do no a intressanter Blog:
“Gärtnerin aus Leidenschaft”

Sie und ihr Mo san á Deitsche de auf La Palma lebn. Sie san ganz am Anfang scho evakuiert worn, sie kennan aber in eanana einga Ferienwohnung wohna – wenigstens miassns net in a Hotelzimmer

Heit schaugt er ganz friedlich aus da Wäsch, da Herr Vulkan
(des grünlich-gelbe do in da Luft oder aufm Kegel is Schwefel! Sehr g’fährlich…)

… i hob me deischt, er hot se’s anderst übalegt – in da Vor-Weihnachtszeit woit er doch á a bisl leichtn

TV CANARIAS is übrigns á a toller Blog auf youtube,

ois nächsts is natierlich da “Copernicus” wichtig:

https://www.copernicus.eu/de

ois wos mit unsana Umwelt z’doa hot, übawachan de

dann gibts á no de Seitn “windy”,

https://www.windy.com/-SO2-tcso2?tcso2,28.979,-11.514,5
oder einfach auf Google suacha

de find i á super, do is rechts a Leistn, do konnst olles obfrong was mit Wind und Wetter z’doa hot

z.B. Luftströmungen

oder
Schneekartn usw.

dann schaug i á hin und wieder auf de Seitn “climmate.gov”

https://www.climate.gov/news-features/climate-qa/which-emits-more-carbon-dioxide-volcanoes-or-human-activities
oder auf Google sucha,
do gibt’s á immer wieder moi an intressantn Beitrog

ansonstn findt ma ja auf Google 1000e Sachan – ma miassat bloss de Zeit hom, dass ma se do durchsuacht…

a ruhiga Advent wàr des Hächste fia de…

net Olle hom des Glück, dass an ruhign Advent hom

auf da Insel La Palma wütet seit 75 Dog a Vulkan, da Cumbre Vieja.
Auf da Westseitn vo dera Insel hot se de Natur und des Lebn vo de Menschn und de Viecha komplett vaändat.

La Palma is a Vulkan-Insel, da letzte Ausbruch war vor rund 50 Johr.
A Jeda hot’s gwusst, dass wos bassiern kannt aber koana hot’s glabt dass des so schnei geht

De Inselbewohner lebn vom Gmias-, Obst- und Bananenanbau, des san riesige Plantagen
und a so schaugts aus de Insel (friara, vorm Vulkan)

wenn ma auf da Kartn links in da Mittn schaugt is do Tazacorte,
wenn ma vo do aus mitm Finger grod noch rechts bis ungefähr zur Mittn geht, do is der Cumbre Vieja.
Der is do gar net ei’zeichnet weil des war bisher bloss a normala Hügl.


(des Gelände links is da internationale Flughafen vo La Palma)

Etz schaugt des aber anders aus – am 11.09. is d’Erdn aufganga und donnert Lava, schwarzn Lavasand und Gase in Fontänen raus,
seit 75 Dog oiso dröhnt der Vulkan,
durch de vui’n Erdbebn (gestern 351 Stck, Magnitude zwischen 2.6 und 5.0 !) werd er immer wieda mit Magma g’speist…

Warnungen warn vorher scho do, aba koana hot g’wusst wann wos bassiert und wo? Weachana Krater geht z’erst auf??? Es war gar koana, es war einfach a Bergal

De seismischn Aktivitätn wern weltweit übawacht, aber meistns is ma erst hintnoch schlauer

(Epizentrum is da Mittlpunkt vo dem Ereignis,
Magnitude is de Stärke vom Erdbeben)

I schaug manchmoi auf de Seitn https://www.youtube.com/watch?v=rbGa1NPzGUk, des is a Übasicht üba weltweite Erdbebn

Bis heit kummt net nur Lava in gigantischn Mengen wia a Wasserfall raus (1163 ha Land san bis heit zuadeckt)

sondern á 15 000 Tonnen Kohlenstoffdioxid CO2 am Dog!! (Korrektur heit um 22.30h)

ein gigantischer Dreck überoi

de Pflanzn dasticka förmlich

ois is zuadeckt mit Lavastaub – á de Autos usw.

De Lava lafft unaufhoitsam wia a Woizn, sie schiabt se einfach üba ois drüber

de Lava-Wand is zwischen 8 und 16 Meter hoch

und vabrennt ois wos do im Weg is

Da Krisenstab richt immer dort Sperrzonen ei, wo da nächste Lavastrom erwart’ werd.
De Leit hom dann 4 Stundn Zeit ois mitz’nemma wos’ braucha. Danoch is de Gegnd Sperrzone, es derf koana mehr nei.
Möbe kumman in a Lager, de evakuiertn Leit kumman in Hotels (heit is Dog 75)
Fia dejenign Leit a totale Katastrophe…

wennst Glück host lafft de Lava um dei Haus rum

aba wos nützt da des?
Dei Haus steht no aba du konnst net nei – de Lava werd obn koid aba drunter lafft de weida…

mitlerweile is de Lava á scho an zwoa Stelln üba de Klippn ins Meer nei

von unten schaugt des a so aus

nei’s Land is entstandn
und wos hom de Leit ois ersts g’frogt?
Wem g’härt na etz der neie Grund?
De Insl hot se vagräßert, des Land g’härt oiso da Regierung vo Spanien

de Inselbewohner kennan leida bloss no zuaschaung und hoffn, dass des boid a End nimmt

I wünsch dene ois Guade und dass der Vulkan boid ruhiga werd und wieda ganz aufhärt

etz hob i lang nix mehr g’schriem…

I hob etz lang nix mehr g’schriem
weil ma konn á nirgns mehr hi

des Scheiss-corona geht ma echt aufn Geist!

I schreib etz hin und wieda über Sachan de woanders bassiern
oder wo i de letztn Johr war und nix drüba g’schriem hob.

Wenn Eich a Thema eifoit des Eich intressiert, schreibts ma’s einfach oda ruafts me ó

Da Advent hot o’gfanga, bei uns is tatsächlich amoi staad,
bei Andane is des net so – und des werd de nächste Gschicht…